अमेरिकेचा दमदार विजय; नामिबियावर ३१ धावांनी मात, संजय कृष्णमूर्तीची झंझावाती खेळी

अमेरिकेचा दमदार विजय; नामिबियावर ३१ धावांनी मात, संजय कृष्णमूर्तीची झंझावाती खेळी

मुंबई (गुरुदत्त वाकदेकर) : आयसीसी पुरुष टी–२० विश्वचषक २०२६ मधील २६ व्या सामन्यात गट ‘अ’ मध्ये अमेरिकेने नामिबियावर ३१ धावांनी प्रभावी विजय मिळवला. चेन्नईतील एम. ए. चिदंबरम स्टेडियमवर खेळल्या गेलेल्या या सामन्यात अमेरिकेने प्रथम फलंदाजी करत २० षटकांत ४ गडी गमावून १९९ धावांचा भक्कम डोंगर उभारला. प्रत्युत्तरात नामिबियाला २० षटकांत ६ गडी गमावून १६८ धावांपर्यंतच मजल मारता आली.

नाणेफेक जिंकून प्रथम फलंदाजी करण्याचा निर्णय अमेरिकेसाठी अत्यंत फलदायी ठरला. कर्णधार मोनांक पटेलने ३० चेंडूंमध्ये ५२ धावांची तडाखेबंद खेळी करत संघाला वेगवान सुरुवात करून दिली. शयान जहांगीरने २२ धावा जोडल्या. त्यानंतर संजय कृष्णमूर्तीने मैदान गाजवत अवघ्या ३३ चेंडूंमध्ये नाबाद ६८ धावांची विस्फोटक खेळी साकारली. या खेळीत त्याने ४ चौकार आणि ६ षटकार ठोकले. मिलिंद कुमारने २८ धावांचे योगदान दिले, तर शुभम रंजनेने शेवटच्या षटकांत झटपट ५ धावा करत धावसंख्या १९९ वर नेऊन ठेवली.

१९९ धावांच्या लक्ष्याचा पाठलाग करताना नामिबियाची सुरुवात समाधानकारक झाली. लॉरेन स्टीनकॅम्पने ३९ चेंडूंमध्ये ५८ धावांची झुंजार खेळी केली. त्याला जान निकोल लॉफ्टी ईटनने २८ आणि जोनाथन स्मिथने ३१ धावांची साथ दिली. मात्र नियमित अंतराने गडी बाद होत गेल्याने नामिबियाचा डाव सावरू शकला नाही. अखेरीस संघाला १६८ धावांवरच समाधान मानावे लागले.

अमेरिकेकडून शॅडली व्हॅन शाल्कवायकने ४ षटकांत ३० धावांत २ गडी घेत प्रभावी गोलंदाजी केली. सौरभ नेत्रावळकर आणि शुभम रंजने यांनी प्रत्येकी १ गडी बाद केला. संजय कृष्णमूर्तीच्या आक्रमक फलंदाजीसाठी त्याला सामनावीर पुरस्काराने गौरवण्यात आले.

या सामन्यात काही महत्त्वाचे विक्रम नोंदले गेले. टी–२० विश्वचषक स्पर्धेत अमेरिकेने केलेली १९९ धावांची ही सर्वोच्च धावसंख्या ठरली. संजय कृष्णमूर्तीने ३३ चेंडूंमध्ये झळकावलेले अर्धशतक हे या स्पर्धेतील आतापर्यंतच्या सामन्यांमधील सर्वात वेगवान अर्धशतकांपैकी एक ठरले. तसेच अमेरिकेने विश्वचषकातील एका सामन्यात सर्वाधिक षटकार ठोकण्याचा संघीय विक्रमही या सामन्यात केला.

या विजयासह अमेरिकेने गुणतालिकेत आपली स्थिती अधिक भक्कम केली असून, पुढील फेरीकडे वाटचाल करण्याच्या दृष्टीने महत्त्वाचे पाऊल टाकले आहे. नामिबियासाठी हा पराभव धक्का देणारा ठरला असला तरी स्टीनकॅम्पची झुंजार फलंदाजी आणि संघाने दाखवलेली झुंज प्रेक्षकांचे लक्ष वेधून घेण्यात यशस्वी ठरली.