शेतकरी व कार्यकर्त्यांशी अपमानास्पद वर्तनप्रकरणी सहाय्यक पोलीस निरीक्षकाची बदली करण्याची मागणी.!!!
शेतकरी व कार्यकर्त्यांशी अपमानास्पद वर्तनप्रकरणी सहाय्यक पोलीस निरीक्षकाची बदली करण्याची मागणी.!!!
एरंडोल प्रतिनिधी :-
शेतकरी कर्जमाफी व विविध मागण्यांसाठी २४ जुलै रोजी कासोदा (ता. एरंडोल) येथे पारोळा टी-पॉईंटवर प्रहार जनशक्ती पक्षाच्या नेतृत्वाखाली चक्काजाम आंदोलन करण्यात आले. या आंदोलनादरम्यान कासोदा पोलीस स्टेशनचे सहाय्यक पोलीस निरीक्षक निलेश राजपूत यांनी शेतकरी व कार्यकर्त्यांशी अपमानास्पद वर्तन केल्याचा आरोप करत, त्यांच्या बदलीची मागणी करत जळगाव जिल्हा पोलीस अधीक्षकांना निवेदन देण्यात आले आहे.
प्रहार जनशक्ती पक्षाच्या कार्यकर्त्यांनी दिलेल्या निवेदनात नमूद केल्याप्रमाणे, संबंधित पोलीस अधिकाऱ्यांनी “तुमचं फोटोशेशन झालं असेल तर ही नौटंकी बंद करा” असे उद्दाम व अपमानास्पद शब्द वापरत आंदोलनकर्त्यांचा अपमान केला. या घटनेचा निषेध करत पक्षाच्या वतीने वरिष्ठ पोलीस अधिकाऱ्यांना व्हिडिओ पुरावा मेलद्वारे पाठवण्यात आला होता. मात्र अद्याप कोणतीही कारवाई न झाल्याने आंदोलनकर्त्यांमध्ये संताप व्यक्त करण्यात आला आहे.
जर तात्काळ बदली अथवा निलंबनाचे आदेश न काढले गेले, तर १५ ऑगस्ट रोजी प्रहार जनशक्ती पक्ष व शेतकरी कार्यकर्ते पोलीस अधीक्षक कार्यालयात उपोषणाला बसणार असल्याचा इशाराही निवेदनात देण्यात आला आहे.
या निवेदनावर तालुका अध्यक्ष सुनिल पाटील उमरेकर, तालुका सरचिटणीस अनिल पाटील, माजी सरपंच सुनिल दयाराम पाटील, मनोहर मगर, विजय महाजन, सुनिल हरगुडे, राजेंद्र फणसे, सचिन पाटील आणि अभिनव पाटील यांच्या सह्या आहेत.