वॉर्ड क्रमांक ५ मधून माजी नगरसेवक रहीम बागवान (सर) पुन्हा चर्चेत – युवक नेतृत्वाचा प्रेरणादायी प्रवास.!!!

वॉर्ड क्रमांक ५ मधून माजी नगरसेवक रहीम बागवान (सर) पुन्हा चर्चेत – युवक नेतृत्वाचा प्रेरणादायी प्रवास.!!!

पाचोरा प्रतिनिधी :-

पाचोरा नगरपरिषद निवडणुकीच्या पार्श्वभूमीवर वॉर्ड क्रमांक ५ मध्ये पुन्हा एकदा माजी नगरसेवक श्री. रहीम बागवान (सर) यांचे नाव चर्चेत आले आहे. यंदा या वॉर्डमध्ये ओबीसी महिला आरक्षण लागू झाले असून, या पार्श्वभूमीवर त्यांच्या पत्नींची संभाव्य उमेदवारी जोरात चर्चेत आहे.

रहीम बागवान हे पाचोरा शहरातील एक परिचित, अभ्यासू आणि जनतेशी घट्ट नातं असलेले नेतृत्व म्हणून ओळखले जातात. लोकसेवा हा धर्म आणि पारदर्शक कार्यपद्धती हा बाणा अशा या नेतृत्वाकडे नागरिकांचे लक्ष पुन्हा वेधले गेले आहे.

युवकांचे प्रेरणास्थान असलेले नेतृत्व

रहीम बागवान यांनी आपल्या राजकीय प्रवासाची सुरुवात अत्यंत लहान वयात — केवळ २२ वर्षांचे असताना — सन २००१ मध्ये केली. वॉर्ड क्रमांक ७ मधून त्यांनी पहिली नगरपालिका निवडणूक लढवली होती. त्या वेळी ते शहरातील सर्वांत तरुण उमेदवार म्हणून ओळखले गेले. अल्प मतांनी पराभव झाला असला, तरी त्यांच्या या प्रयत्नामुळे शहरात युवकांना निवडणूक राजकारणात उतरून नेतृत्व दाखवण्याची प्रेरणा मिळाली.

विद्यार्थीदशेतच त्यांनी NSUI विद्यार्थी संघटनेचे जिल्हा सरचिटणीस म्हणून कार्य केले. त्यानंतर ते पाचोरा शहर युवक काँग्रेस अध्यक्ष आणि पुढे जळगाव जिल्हा युवक काँग्रेसचे उपाध्यक्ष या पदांवर राहून युवकांना संघटनात्मक राजकारणात सहभागी करण्याचे काम त्यांनी केले.

नगरसेवक म्हणून उल्लेखनीय कामगिरी

सन २००६ मध्ये काँग्रेसकडून उमेदवारी न मिळाल्यानेही त्यांनी जनसंपर्क थांबवला नाही. नागरिकांच्या अडचणी, विद्यार्थ्यांच्या प्रश्नांपासून ते वंचित घटकांच्या समस्या — प्रत्येक पातळीवर ते सक्रिय राहिले.

या सातत्यपूर्ण कार्याचा परिणाम म्हणजे सन २००९ मध्ये वॉर्ड क्रमांक २१ मधील पोटनिवडणुकीत त्यांनी विजय मिळवून नगरसेवक पद मिळवले. पुढील अडीच वर्षांच्या कार्यकाळात त्यांनी रस्ते, नाल्या, पाणीपुरवठा आणि शिक्षण सुविधा या क्षेत्रांत लक्षणीय कामगिरी केली.

नागरिकांच्या प्रत्येक समस्येला तत्काळ प्रतिसाद देणे आणि त्यांच्या घरपोच उपलब्ध राहणे ही त्यांची विशेष कार्यशैली राहिली.

राजकारणापलीकडील समाजसेवा

राजकीय पार्श्वभूमी नसताना फक्त जनतेच्या पाठिंब्यावर नेतृत्व निर्माण करणारे रहीम बागवान हे स्वतःच्या मेहनतीवर उभे राहिलेले व्यक्तिमत्व आहे. कैलासवासी वि. जी. पाटील यांच्या मार्गदर्शनाखाली त्यांनी लोकसेवेचे धडे घेतले आणि “राजकारण म्हणजे लोकसेवा” ही संकल्पना अंगी बाणवली.

ते तिन्ही भाषांवर प्रभुत्व असलेले, अभ्यासू आणि चिंतनशील व्यक्तिमत्व म्हणून ओळखले जातात. शिक्षण क्षेत्रातही त्यांचा सक्रिय सहभाग आहे — विद्यार्थ्यांसाठी शैक्षणिक उपक्रम राबविणे, गरजू विद्यार्थ्यांना मदत करणे आणि सामाजिक उपक्रमांमध्ये सहभाग घेणे ही त्यांची सातत्यपूर्ण वाटचाल आहे.

नागरिकांमध्ये उत्सुकता आणि अपेक्षा

आगामी निवडणुकांच्या पार्श्वभूमीवर वॉर्ड क्रमांक ५ मध्ये “रहीम बागवान पुन्हा मैदानात उतरणार का?” असा प्रश्न चर्चेचा विषय ठरला आहे. युवक, महिला आणि ज्येष्ठ नागरिकांच्या गटांमध्ये त्यांच्या नेतृत्वाबद्दल सकारात्मक चर्चा सुरू आहे.

वॉर्डातील मतदारांचा विश्वास आणि त्यांची जनसंपर्क शैली लक्षात घेता, त्यांच्या पत्नीची उमेदवारी निश्चित झाल्यास ही निवडणूक अधिक रंगतदार होण्याची चिन्हे आहेत.

एका सामान्य नगरपालिका कर्मचाऱ्याच्या घरातून उभं राहून लोकसेवक म्हणून आपलं स्थान निर्माण करणारे रहीम बागवान (सर) हे नाव आजही पाचोरा शहरात प्रामाणिकपणा, अभ्यासू नेतृत्व आणि लोकसेवेची ओळख म्हणून घेतले जाते.