पाचोरा बस स्थानक परिसरात गोळीबार, एक जण गंभीर जखमी.!!!
पाचोरा प्रतिनिधी :-
जळगाव जिल्ह्यातील पाचोरा शहरात आज (दि. ४ जुलै) दुपारी एक धक्कादायक घटना घडली असून, पाचोरा बस स्थानक परिसरात भरदिवसा झालेल्या गोळीबारामुळे शहरात खळबळ उडाली आहे. या गोळीबारात एक युवक गंभीर जखमी झाला असून, त्याच्यावर शासकीय रुग्णालयात उपचार सुरू आहेत.
प्राथमिक माहितीच्या आधारे, ही घटना जुन्या वादातून घडल्याचं बोललं जात आहे. गोळीबार झाल्यानंतर काही काळ परिसरात भीतीचं वातावरण निर्माण झालं होतं. स्थानिक नागरिकांनी तत्काळ पोलिसांना याची माहिती दिल्यानंतर पाचोरा पोलीस घटनास्थळी दाखल झाले. पोलिसांनी घटनास्थळाचा पंचनामा करत परिस्थितीवर नियंत्रण मिळवलं.
गोळी लागलेल्या युवकाची ओळख अद्याप स्पष्ट झाली नसली तरी, त्याची प्रकृती चिंताजनक असून, पुढील उपचारासाठी त्याला जळगाव हलवण्याची शक्यता आहे. दरम्यान, या प्रकरणात गुन्हा दाखल करण्यात आला असून, पोलिसांकडून अधिक तपास सुरू आहे.
ही घटना पूर्वीच्या दुश्मनीतून घडली असावी, अशी शक्यता पोलिसांकडून व्यक्त करण्यात येत आहे. सीसीटीव्ही फुटेज, साक्षीदारांचे जबाब आणि तांत्रिक पुरावे यांच्या आधारे आरोपींचा शोध घेण्याचे प्रयत्न सुरू आहेत.
सविस्तर माहिती थोड्याच वेळात…