जात वैधतेच्या लढाईत नगराध्यक्ष रेखा मालचे विजयी; तक्रार फेटाळत समितीचा मोठा दिलासा
भडगाव प्रतिनिधी :-
भडगाव नगरपरिषदेच्या लोकनियुक्त नगराध्यक्ष सौ. रेखा प्रदीप मालचे यांच्या जात वैधता प्रमाणपत्राविरोधात दाखल करण्यात आलेल्या तक्रारीवर अखेर पूर्णविराम लागला आहे. धुळे येथील जात पडताळणी समितीने सखोल सुनावणीनंतर तक्रार फेटाळून लावत रेखा मालचे यांचे ‘भिल्ल’ जातीचे वैधता प्रमाणपत्र कायम ठेवण्याचा निर्णय दिला आहे. या निर्णयामुळे नगराध्यक्ष मालचे यांना मोठा कायदेशीर दिलासा मिळाला असून, भडगावच्या राजकीय वर्तुळात या निर्णयाची जोरदार चर्चा सुरू झाली आहे.
रेखा मालचे यांना सन २०१४ मध्ये नंदुरबार येथील जात पडताळणी समितीकडून ‘भिल्ल’ (अनुसूचित जमात) जातीचे वैधता प्रमाणपत्र प्रदान करण्यात आले होते. त्यानंतर २०२५ मध्ये झालेल्या भडगाव नगरपरिषदेच्या सार्वत्रिक निवडणुकीत त्यांनी अनुसूचित जमातीसाठी राखीव जागेवरून निवडणूक लढवत प्रतिस्पर्धी सुशीला शांताराम पाटील यांचा पराभव करून नगराध्यक्षपद पटकावले.
निवडणुकीतील पराभवानंतर त्यांच्या जात वैधता प्रमाणपत्रावर आक्षेप घेत धुळे जात पडताळणी समितीकडे तक्रार दाखल करण्यात आली. समितीने दोन्ही पक्षांची बाजू, सादर करण्यात आलेली कागदपत्रे आणि पुरावे यांचा सखोल अभ्यास करून सुनावणी घेतली. त्यानंतर तक्रारीत कोणताही ठोस व कायदेशीर आधार नसल्याचे स्पष्ट झाल्याने समितीने तक्रार फेटाळून लावत रेखा मालचे यांचे जात वैधता प्रमाणपत्र कायम ठेवले.
या प्रकरणात नगराध्यक्ष रेखा मालचे यांच्या वतीने ॲड. बी. टी. अहिरे यांनी प्रभावी युक्तिवाद केला, तर ॲड. समाधान सोनवणे यांनी त्यांना सहकार्य केले. त्यांच्या मांडणीला समितीने ग्राह्य धरल्याचे बोलले जात आहे.
या निर्णयानंतर नगराध्यक्ष रेखा मालचे यांच्या समर्थकांमध्ये आनंदाचे वातावरण असून, भडगावच्या राजकारणात हा निर्णय महत्त्वाचा टप्पा मानला जात आहे.
रेखा मालचे यांची प्रतिक्रिया
“सत्याचा विजय झाला आहे. विरोधकांनी केवळ राजकीय आकसापोटी व जनतेने नाकारल्याचा राग काढण्यासाठी ही खोटी तक्रार केली होती. समितीच्या या निर्णयामुळे लोकशाहीचा आणि भडगावच्या जनतेचा विजय झाला आहे.”
— सौ. रेखा प्रदीप मालचे, लोकनियुक्त नगराध्यक्ष, भडगाव
