भडगाव प्रतिनिधी :-

कर्मवीर तात्यासाहेब हरि रावजी पाटील,किसान शिक्षण संस्था, भडगाव,संचलीत,गोपीचंद पुना पाटील, विद्यालय, कोळगाव ता-भडगाव येथील इयत्ता बारावीचा विद्यार्थी व किसान स्पोर्ट्स अकॕडमीचा राष्ट्रीय खेळाडू पैलवान स्वराज प्रल्हाद चौधरी ह्याची लहान बहिण कु.साध्वी मिनाक्षी प्रल्हाद चौधरी हिने राष्ट्रीय शालेय वेटलिफ्टींग क्रीडा स्पर्धेत सुवर्ण पदक प्राप्त केले आहे.

स्कूल गेम फेडरेशन ऑफ इंडियातर्फे खेलो इंडिया इनडोअर स्टेडियम,इटानगर, अरुणाचल प्रदेश येथे 25 नोव्हेंबर ते 1 डिसेंबर 2025 पर्यंत आयोजित करण्यात आलेल्या 69 व्या राष्ट्रीय शालेय वेटलिफ्टिंग क्रीडा स्पर्धेत 17 वर्षाआतील 63 किलो वजनी गटात कु.साध्वी हिने क्लीन अँड जर्क यात 89 आणि स्नॅच मध्ये 74 किलो असे एकूण 163 किलो वजन उचलत प्रथम स्थान मिळवत करीत सुवर्णपदक प्राप्त केले आहे,बालक मंदिर संस्था सेकंडरी स्कूल, कल्याण येथे शिकणारी साध्वी रिक्रीएशन व्यायाम शाळा,कल्याण येथे सराव करते.

विशेष बाब म्हणजे गेल्या वर्षी देखील इंफाळ,मणिपूर येथे पार पडलेल्या 68 वी राष्ट्रीय वेटलिफ्टिंग क्रीडा स्पर्धेत कु.साध्वी हिने 17 वर्षाआतील स्पर्धेत सुवर्ण पदक प्राप्त केले आहे.

कु.साध्वी हिला प्रवीण व्यवहारे, सुनिल दळवी,मनिषा मॅडम,पैलवान प्रल्हाद चौधरी,सरपंच संजय कराळे, संतोष कराळे,सयाजी मदने,आदर्श क्रीडा शिक्षक बी.डी.साळुंखे,प्रा.रघुनाथ पाटील,राष्ट्रीय खो-खो पंच प्रा.प्रेमचंद चौधरी यांचे मार्गदर्शन लाभले.

साध्वीच्या या यशाबद्दल जळगाव जिल्हा बँक संचालक प्रतापराव पाटील,जळगाव दुध फेडरेशन संचालिका डॉ.पुनमताई पाटील,मंत्रालयीन उपसचिव प्रशांतराव पाटील,माजी नगराध्यक्ष शामकांत भोसले,माध्यमिक शिक्षक पतपेढी संचालक जगदीश पाटील, कोळगाव महाविद्यालयाचे प्राचार्य अनिल पवार,पर्यवेक्षिका सिमा शिसोदे यांनी किसान स्पोर्ट्स अकॕडमीचे शिक्षक-शिक्षकेतर बंधु-भगिनी यांनी आनंद व्यक्त करीत तिचं अभिनंदन करुन भावी वाटचालीसाठी शुभेच्छा दिल्या आहेत.

मुंबई (गुरुदत्त वाकदेकर) : सायन–माटुंगा परिसरातील प्रतिष्ठित समाजसेविका भारती भरत पाठक यांचा हिरक महोत्सवी ७५ वा वाढदिवस श्री रावजी जीवराज चांगडईवाला हॉल येथे मोठ्या उत्साहात साजरा करण्यात आला.

याप्रसंगी शुभेच्छुकांची मोठी गर्दी उत्स्फूर्तपणे उपस्थित होती. गुजरात हायकोर्टच्या माजी न्यायमूर्ती आदरणीय सोनियाबेन गोकाणी, तारक मेहता का उल्टा चश्मा फेम श्यामभाई पाठक (पोपटलालजी), लायन्स क्लबचे गव्हर्नर, अनेक पास्ट गव्हर्नर, तसेच बुद्धिजीवी, शिक्षणतज्ज्ञ, समाजसेवक, पाठक व गोकाणी परिवारातील मान्यवर अशा अनेक व्यक्तींची उपस्थिती लक्षणीय होती.

कार्यक्रमातील विशेष आकर्षण म्हणून लहानशी गोड मुलगी विभूती देरोला हिने सादर केलेले मनमोहक नृत्य विशेष दाद मिळवून गेले. आपल्या आजींना वाढदिवसाच्या शुभेच्छा व्यक्त करत तिने सभागृहात आनंददायी वातावरण निर्माण केले.

या प्रसंगी विनोदभाई निवेटिया यांनी मुलींच्या शिक्षणासाठी ‘सेवा मंडळ एज्युकेशन सोसायटी’ला ₹५०,००० आणि लायन ताराचंद बापा रुग्णालयाला ₹५०,००० देणगी जाहीर केली. त्यांच्या प्रेरणेने भारती भरत पाठक यांनीही मुलींच्या शिक्षणासाठी ₹५०,००० आणि रुग्णालयासाठी ₹५०,००० अशी समतुल्य देणगी जाहीर केली. समारोपात पाठक व गोकाणी परिवाराने सर्व उपस्थित मान्यवरांचे मनःपूर्वक आभार मानत कार्यक्रमाची सांगता केली.

मुंबई (गुरुदत्त वाकदेकर) : कलेच्या विविध क्षेत्रात दीर्घकाळ उल्लेखनीय योगदान देणाऱ्या कलावंतांना राज्य सांस्कृतिक पुरस्काराने गौरविण्यात येणार असल्याची माहिती सांस्कृतिक कार्यमंत्री ॲड. आशिष शेलार यांनी दिली. नाटक, कंठसंगीत, उपशास्त्रीय संगीत, वाद्यसंगीत, मराठी चित्रपट, कीर्तन/समाजप्रबोधन, तमाशा, शाहिरी, नृत्य, लोककला, आदिवासी गिरीजन कला, कलादान, प्रयोगात्मक कलाक्षेत्र, लोकनृत्य, लावणी/संगीतबारी, भारुड/विधीनाट्य, वाद्यनिर्मिती, झाडीपट्टी, खडीगंमत, दशावतार, नमनखेळ, वहीगायन, मौखिक परंपरा, संग्रहालय/संस्था, ध्वनीतंत्रज्ञ, संगीत संयोजन, व्हॉइस ओव्हर अशा विविध क्षेत्रांतील कलावंतांचा या पुरस्कारांत समावेश आहे.

या पुरस्कारांचे स्वरूप ज्येष्ठ कलावंतांसाठी तीन लाख रुपये, तर युवा कलावंतांसाठी एक लाख रुपये, तसेच मानचिन्ह, सन्मानपत्र आणि शाल असे आहे. सर्व पुरस्कार मुंबई येथे लवकरच आयोजित करण्यात येणाऱ्या विशेष सोहळ्यात सन्मानपूर्वक प्रदान केले जाणार आहेत. या पुरस्कारांसाठी निवडलेल्या सर्व मान्यवरांची यादी अधिकृतपणे जाहीर करण्यात आली आहे.

ज्येष्ठ पुरस्कार विजेते

अरुण कदम (२०२५),

कंठसंगीत – धनंजय जोशी (२०२५),

वाद्यसंगीत – विजय चव्हाण (२०२५),

मराठी चित्रपट – शिवाजी लोटन पाटील (२०२५),

उपशास्त्रीय संगीत – उदय भवाळकर (२०२५),

किर्तन/समाजप्रबोधन – गहिनीनाथ ज्ञानेश्वर औसेकर महाराज (२०२५),

तमाशा – कोंडीराम आवळे (२०२५),

शाहिरी – शाहिर मधुकर मोरे (२०२५),

नृत्य – श्रीमती रंजना फडके (२०२५),

लोककला – हरिभाऊ वेरुळकर (२०२५),

आदिवासी गिरीजन – रायसिंग हिरा पाडवी (२०२५),

कलादान – चंद्रकांत घरोटे (२०२५),

प्रयोगात्मक कला अभ्यासक/पत्रकार – प्रा. आनंद गिरी (२०२४), संजीव भागवत (२०२५),

लोकनृत्य – सुभाष नकाशे (२०२४), अरविंद राजपूत (२०२५),

लावणी/संगीतबारी – श्रीमती शकुंतला नगरकर (२०२४), श्रीमती कल्पना जावळीकर (२०२५),

भारुड/विधीनाट्य/गौळण – श्रीमती पदमजा कुलकर्णी (२०२४), श्रीमती गोदावरी मुंडे (२०२५),

वाद्यनिर्मिती – युसुफ घडूलाल मुल्ला (२०२४), भालेराव नागोराव दडांजे (२०२५),

झाडीपट्टी/दंडार/खडीगंमत – रामदास चौधरी (२०२४), बुधा भलावी (२०२५),

दशावतार/नमनखेळ/वहीगायन – ओमप्रकाश यशवंत चव्हाण (२०२४), भानुदास शंभा सावंत (२०२५),

दुर्मिळ प्रयोगात्मक कला व मौखिक परंपरा जतन करणारे – धर्मा कांबळे (२०२४), श्रीमती साखराबाई टेकाळे (२०२५),

संग्रहालय/संस्था – विश्राम ठाकर आदिवासी कला आंगण चॅरिटेबल ट्रस्ट (२०२५), तांबवेश्वर शाहिरी कलापथक, बीड (तुकाराम ठोंबरे) (२०२४),

ध्वनीतंत्रज्ञ – अविनाश ओक (२०२४), महेश अंबेरकर (२०२५),

संगीत संयोजन – अमर हळदीपूर (२०२४), कमलेश भडकमकर (२०२५),

व्हॉइस ओव्हर – अंबरीश मिश्र (२०२४), उदय सबनीस (२०२५).

युवा पुरस्कार विजेते

नाटक – तेजश्री प्रधान (२०२४), भूषण कडू (२०२५),

कंठसंगीत – धनंजय म्हसकर (२०२४), मयूर सुकाळे (२०२५),

वाद्यसंगीत – ऋषिकेश जगताप (२०२४), वरद कठापूरकर (२०२५),

मराठी चित्रपट – मधुरा वेलणकर (२०२४), शंतनु रोडे (२०२५),

उपशास्त्रीय संगीत – राहुल देशपांडे (२०२४), भाग्येश मराठे (२०२५),

किर्तन/समाजप्रबोधन – जयवंत बोधले (२०२४), ज्ञानेश्वर माऊली कदम (२०२५),

तमाशा – नितीन बनसोडे (२०२४), अमृता थोरात (२०२५),

शाहिरी – शाहिर आझाद नाईकवडी (२०२४), शाहिरा अनिता खरात (२०२५),

नृत्य – वृषाली दाबके (२०२४), संतोष भांगरे (२०२५),

लोककला – संदीप पाल महाराज (२०२४), चेतन बेले (२०२५),

आदिवासी गिरीजन – साबूलाल बाबूलाल दहिकर (२०२४), गंगुबाई चांगो भगत (२०२५),

कलादान – श्रीमती कस्तुरी देशपांडे (२०२४), सिद्धेश कलिंगण (२०२५),

प्रयोगात्मक कला अभ्यासक/पत्रकार – खंडुराज गायकवाड (२०२४), तेजस्विनी आचरेकर (२०२५),

लोकनृत्य – दीपक बीडकर (२०२४), गणेश कांबळे (२०२५),

लावणी/संगीतबारी – प्रमिला लोदगेकर (२०२४), वैशाली वाफळेकर (२०२५),

भारुड/विधीनाट्य/गौळण – हमीद सय्यद (२०२४), रामानंद उगले (२०२५),

वाद्यनिर्मिती – उमाशंकर दाते (२०२४), सर्वजीत विष्णू पोळ (२०२५),

झाडीपट्टी/दंडार/खडीगंमत – मुकेश देशमुख (२०२४), दुधराम परसराम कावळे (२०२५),

दशावतार/नमनखेळ/वहीगायन – लक्ष्मीकांत नाईक (२०२४), रामकृष्ण कैलास घुळे (२०२५),

दुर्मिळ प्रयोगात्मक कला व मौखिक परंपरा जतन करणारे – रेणुका शेंडगे जेजूरीकर (२०२४), प्रसाद गरुड (२०२५),

संग्रहालय/संस्था – सव्यसाची गुरुकुलम (लखन जाधव) (२०२४), इतिहासाचे अबोल साक्षिदार बहुउद्देशीय ट्रस्ट (निलेश सकट) (२०२५),

ध्वनीतंत्रज्ञ – प्रणाम पानसरे (२०२४), विराज भोसले (२०२५),

संगीत संयोजन – अनुराग गोडबोले (२०२४), अमित पाध्ये (२०२५),

व्हॉइस ओव्हर – मेघना एरंडे (२०२४), समिरा गुजर (२०२५).

सर्व पुरस्कारप्राप्त मान्यवरांचे अभिनंदन सांस्कृतिक कार्य विभागाचे सचिव डॉ. किरण कुलकर्णी आणि सांस्कृतिक कार्यमंत्री ॲड. आशिष शेलार यांनी केले आहे. राज्यातील कलावंतांच्या सातत्यपूर्ण सर्जनशीलतेला आणि सांस्कृतिक परंपरेला मिळणारा हा सन्मान कलाक्षेत्रासाठी प्रेरणादायी ठरेल, अशी भावना व्यक्त करण्यात आली आहे.

महापरिनिर्वाण दिनानिमित्त निःशुल्क ‘डॉ. बाबासाहेब आंबेडकर टूर सर्किट’ – प्रेरणादायी प्रवास अनुभवण्याची संधी

मुंबई (गुरुदत्त वाकदेकर) : भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त पर्यटन संचालनालयाने ‘डॉ. बाबासाहेब आंबेडकर टूर सर्किट’चे आयोजन केले आहे. मुंबईतील चैत्यभूमी येथे भेट देणाऱ्या पर्यटकांसाठी हा टूर सर्किट पूर्णपणे निःशुल्क असेल. पर्यटन मंत्री शंभूराज देसाई यांनी पर्यटकांना या संधीचा लाभ घेण्याचे आवाहन केले आहे.

हा सर्किट केवळ पर्यटनाचा नाही, तर भारताच्या लोकशाहीचा पाया रचणाऱ्या डॉ. आंबेडकर यांच्या विचारांना अभिवादन आहे. त्यांच्या जीवनातील क्रांतिकारी कार्य, संघर्ष आणि आदर्श भावी पिढीपर्यंत पोहोचतील, असे पर्यटन मंत्री शंभूराज देसाई म्हणाले. महाराष्ट्र पर्यटन संचालनालयाने इतिहास, संस्कृती आणि सामाजिक परिवर्तन यांना जोडणारा हा प्रेरणादायी प्रवास रचला आहे.

टूर सर्किटमध्ये मुंबईतील प्रमुख स्थळांचा समावेश आहे. यात चैत्यभूमी, राजगृह, डॉ. बाबासाहेब आंबेडकर इकॉनॉमिक्स व कॉमर्स महाविद्यालय (वडाळा) आणि डॉ. बाबासाहेब आंबेडकर भवन यांचा समावेश आहे. तसेच परळमधील बीआयटी चाळ, सिद्धार्थ महाविद्यालय, फोर्ट या स्थळांवरही भेट दिली जाईल. या स्थळांवर डॉ. आंबेडकरांच्या पदस्पर्शाने पावन झालेली जागा, सामाजिक समता, शिक्षण व संविधान निर्मितीतील योगदान यांचे महत्त्व नागरिकांपर्यंत पोहोचविण्याचा प्रयत्न केला जात आहे. प्रत्येक स्थळ भावनिक दृष्टिकोनातून अनुभवता येईल, ज्यामुळे पर्यटकांना डॉ. आंबेडकरांच्या प्रेरणादायी जीवनाशी जवळून जोडण्याची संधी मिळेल.

दररोज ३ बसेस उपलब्ध असतील, आणि प्रथम येणाऱ्यांना प्रथम प्राधान्य मिळेल. सहभागी पर्यटकांसाठी निःशुल्क प्रवास, सहल मार्गदर्शक आणि अल्पोपहार या सुविधा पुरवण्यात येतील. टूर सर्किटचा शुभारंभ ३ डिसेंबर २०२५ रोजी सकाळी ९.३० वाजता वीर सावरकर राष्ट्रीय स्मारक समोर गणपती मंदिर, शिवाजी पार्क येथे होईल. सहलीचा समारोप चैत्यभूमी, दादर येथे होणार आहे.

संपर्क:

सूरज चतुर्वेदी – ८१०८१७५५३०

पवन पवार – ७६६६६०३२११

पर्यटन संचालनालय चॅटबोट क्र – ९९९३३०८८८३

मुंबई :-

राज्यातील वाहनधारकांसाठी हाय सिक्युरिटी रजिस्ट्रेशन प्लेट (HSRP) लावण्याची अंतिम मुदत आता काहीच दिवसांवर येऊन ठेपली आहे. ३० नोव्हेंबर २०२५ पर्यंत जुन्या वाहनांवर HSRP बसवणे अनिवार्य करण्यात आले असून ही मुदत न पाळणाऱ्यांवर वाहतूक पोलिसांकडून कडक कारवाई आणि मोठ्या दंडाची तरतूद करण्यात आली आहे.

राज्यातील मोठ्या प्रमाणातील वाहनांवर अजूनही HSRP बसवलेली नसल्याने प्रशासन चिंतेत असून, शेवटच्या क्षणी होणारी गर्दी टाळण्यासाठी तातडीने नोंदणी करण्याचे आवाहन करण्यात येत आहे.

एप्रिल 2019 पूर्वीची सर्व वाहने अनिवार्यपणे HSRPच्या कक्षेत

केंद्र सरकारच्या आदेशानुसार १ एप्रिल २०१९ पूर्वी नोंदणीकृत सर्व वाहनधारकांना HSRP लावणे बंधनकारक आहे. यामध्ये दोनचाकी, चारचाकी, तसेच व्यावसायिक वाहने यांचा समावेश आहे.

सरकारने आधीच तीनवेळा मुदतवाढ दिल्यानंतर आता जाहीर केलेली ३० नोव्हेंबरची तारीख अत्यंत निर्णायक मानली जात आहे.

याआधीच्या मुदतवाढी :

30 एप्रिल 2025

15 ऑगस्ट 2025

30 नोव्हेंबर 2025 (सद्य अंतिम तारीख)

चर्चा अशी असली की मुदत 31 डिसेंबर 2025 पर्यंत वाढू शकते, परंतु याबाबत कोणतीही अधिकृत घोषणा झालेली नाही.

लाखो वाहनांनी अद्याप अर्जच केलेला नाही

महाराष्ट्रात HSRP प्रक्रियेचा वेग अत्यंत धीमा असल्याचे वाहतूक विभागाने मान्य केले आहे.

राज्यभरात लाखो वाहनधारकांनी अद्याप HSRP साठी नोंदणीच केली नाही

बुक केलेल्या 56 हजार वाहनांवर HSRP बसवण्याचे काम सुरु आहे

तरीही राज्यातील एकूण वाहनांच्या तुलनेत ही संख्या अत्यल्प

यामुळे अंतिम मुदतीजवळ मोठी गर्दी निर्माण होण्याची शक्यता आहे.

HSRP नसेल तर दंड कठोर

HSRP अनिवार्य असून नियम न पाळणाऱ्यांसाठी दंडाची तरतूद खालीलप्रमाणे आहे—

रजिस्ट्रेशन केले, पण प्लेट बसवली नाही → ₹1,000 दंड

रजिस्ट्रेशनच केलेले नाही → थेट ₹10,000 दंड

म्हणजेच, आजच नोंदणी केली तर जवळपास ₹9,000 दंड वाचू शकतो.

याशिवाय, वाहन तपासणी, विमा क्लेम, आरटीओ प्रक्रिया, मालकी बदल यांसारख्या कामांमध्येही अडथळे येऊ शकतात.

HSRP म्हणजे काय? का आवश्यक.?

HSRP म्हणजे उच्च सुरक्षा प्रदान करणारी ॲल्युमिनियम नंबर प्लेट. यात खालील सुरक्षा फीचर्स असतात

अशोक चक्रासह क्रोमियम-आधारित होलोग्राम

लेझर-इन्कोडेड 9-अंकी युनिक आयडी

नॉन-रिमूव्हेबल स्नॅप लॉक

बनावट नंबर प्लेट आणि छेडछाड होऊ नये यासाठी टेंपर-प्रूफ डिझाईन

या तंत्रज्ञानामुळे चोरी झालेली वाहने शोधणे सोपे होते आणि बनावट नंबर प्लेटचा वापर रोखला जातो.

वाहनधारकांनी काय करावे?

शक्य तितक्या लवकर ऑनलाइन किंवा अधिकृत केंद्रावर HSRP साठी बुकिंग करावे

आधीच बुकिंग केले असल्यास फिटमेंटची तारीख चुकवू नये

शेवटच्या क्षणी होणारी गर्दी टाळावी

दंड, वाहन जप्ती किंवा तपासणीतील अडचणींपासून बचावासाठी नियमांनुसार प्लेट बसवावी

HSRP अनिवार्यतेबाबत शासनाने चार वेळा मुदतवाढ दिली असली तरी नागरिकांकडून अजूनही अपेक्षित प्रतिसाद मिळत नाही. येत्या काही दिवसांत अंतिम तारीख जवळ येत असल्याने प्रशासनाकडून मोठ्या प्रमाणात तपासणी मोहीमा राबवल्या जाण्याची शक्यता आहे. त्यामुळे वाहनधारकांनी वेळ न घालवता तात्काळ HSRP बसवणेच हिताचे आहे.

बंगालच्या उपसागरात निर्माण झालेल्या ‘दितवाह’ चक्रीवादळाने श्रीलंकेत भीषण हाहाकार माजविल्यानंतर आता भारतीय किनाऱ्याकडे वेगाने सरकण्यास सुरुवात केली आहे. श्रीलंकेत मुसळधार पावसामुळे व्यापक नुकसान झाले असून, आतापर्यंत 123 जणांचा मृत्यू, तर 130 जण बेपत्ता असल्याची प्राथमिक माहिती समोर आली आहे. पूर, भूस्खलन आणि वाऱ्याच्या तुफानी गस्तींमुळे अनेक भागांतील जनजीवन विस्कळीत झाले आहे.

दरम्यान, हे चक्रीवादळ आता भारतीय किनारपट्टीकडे सरकत असून पुढील 48 तास भारतीय उपखंडासाठी निर्णायक ठरणार आहेत. भारतीय हवामान विभागाचे (IMD) महासंचालक डॉ. मृत्युंजय महापात्रा यांनी दिलेल्या माहितीनुसार, हे चक्रीवादळ शनिवारी मध्यरात्री तामिळनाडूच्या किनारपट्टीपासून 60–70 किमी अंतरावर येण्याची शक्यता आहे. तर रविवारी सकाळपर्यंत ते पुद्दुचेरीच्या किनारपट्टीवर प्रभाव टाकेल, असा अंदाज व्यक्त करण्यात आला आहे.

वादळाचा वेग 90 किमी/तासापर्यंत जाण्याची शक्यता

हवामान विभागानुसार, दितवाहची तीव्रता महासागरात कायम राहण्याची शक्यता असून—

तामिळनाडू व पुद्दुचेरीच्या किनारी भागांत वाऱ्याचा वेग 70–80 किमी/तास.काही ठिकाणी 90 किमी/तास पर्यंत

आंध्र प्रदेशच्या किनारी भागांत 50–60 किमी/तास

पर्यंत वाढू शकतो. समुद्रात 8 मीटरपर्यंत उंच लाटा उसळण्याचा इशाराही देण्यात आला आहे. त्यामुळे मच्छीमार बांधवांना समुद्रात न जाण्याचे आवाहन करण्यात आले आहे.

तामिळनाडू, पुद्दुचेरी आणि आंध्र प्रदेशला रेड अलर्ट

चक्रीवादळाच्या संभाव्य तडाख्याच्या पार्श्वभूमीवर IMD ने तामिळनाडू, पुद्दुचेरी आणि काही आंध्र प्रदेशातील भागांना रेड अलर्ट जारी केला आहे. या तीनही राज्यांना अतिमुसळधार पावसाचा, वाऱ्याच्या तुफानी गस्तींचा आणि पुराचा इशारा देण्यात आला आहे. तसेच तेलंगणालाही या वादळाचा अप्रत्यक्ष फटका बसू शकतो, असेही IMD ने स्पष्ट केले आहे.

प्रशासनाने अनेक किनारी जिल्ह्यांत शाळा बंद ठेवण्याचा निर्णय घेतला असून, बचाव पथके, NDRF आणि SDRF तैनात करण्यात आली आहेत.

महाराष्ट्रातील स्थिती

दितवाहचा महाराष्ट्रावर थेट परिणाम होणार नसला तरी काही वातावरणीय बदलांचे संकेत IMD ने दिले आहेत. कोकणात ढगाळ वातावरण, अधूनमधून हलका ते मध्यम पाऊस आणि वाऱ्याचा वेग वाढण्याची शक्यता वर्तवली आहे. थंडी काही प्रमाणात कमी-जास्त होण्याचीही शक्यता आहे. नागरिकांना हवामान खात्याच्या अद्ययावत सूचनांकडे लक्ष ठेवण्याचे आवाहन करण्यात आले आहे.

चक्रीवादळाच्या नजरेत पुढील 48 तास

तज्ञांच्या मते पुढील दोन दिवस या चक्रीवादळाचा सर्वाधिक प्रभाव जाणवेल. तटीय राज्ये आणि त्यांतील जिल्ह्यांना या काळात जोरदार वारे, मुसळधार पाऊस आणि समुद्राच्या उंच भरतीला सामोरे जावे लागू शकते. समुद्रकिनारी राहणाऱ्या नागरिकांना सुरक्षित ठिकाणी हलविण्याचे काम प्रशासनाने गतीने सुरू केले आहे.

भडगाव प्रतिनिधी :-

भडगाव नगरपरिषद सार्वत्रिक निवडणूक 2025 जवळ येत असताना निवडणूक प्रशासन पूर्ण सज्ज झाले आहे. आगामी निवडणूक सुरळीत, पारदर्शक आणि कायदेशीर प्रक्रियेत पार पडावी यासाठी तालुका प्रशासन, निवडणूक शाखा आणि नियुक्त अधिकारी सतत तयारीत आहेत. या पार्श्वभूमीवर नगरपरिषद निवडणुकीसाठी नियुक्त करण्यात आलेल्या कर्मचाऱ्यांचे दुसरे प्रशिक्षण सत्र आज तालुका क्रीडा संकुल, पाचोरा रोड, भडगाव येथे संपन्न झाले.

या प्रशिक्षणाला मतदान कर्मचाऱ्यांची उत्स्फूर्त उपस्थिती पाहायला मिळाली. सकाळी अचूक 10 वाजता सुरू झालेल्या या सत्रात निवडणूक प्रक्रिया, नियम, मार्गदर्शक तत्त्वे, मतदान केंद्रांवरील जबाबदाऱ्या आणि EVM हाताळणी यासह विविध बाबींवर सखोल मार्गदर्शन करण्यात आले.

विविध प्रभागात ४३ मतदान केंद्र — ३३० मतदान कर्मचारी सज्ज

भडगाव शहरातील प्रभागनिहाय निवडणूक यंत्रणेची आखणी पूर्ण झाली आहे. संपूर्ण नगरपरिषदेतील 43 मतदान केंद्रे अंतिम करण्यात आली असून या केंद्रांवर एकूण 330 मतदान कर्मचारी नियुक्त करण्यात आले आहेत. त्याशिवाय मतदान दिवशी देखरेखीचे काम पार पाडण्यासाठी 6 सेक्टर अधिकारीही नियुक्त झाले आहेत.

या अधिकाऱ्यांची जबाबदारी मतदान केंद्रांची पाहणी करणे, कर्मचार्‍यांना मदत करणे, तांत्रिक समस्या सोडवणे आणि मतदान प्रक्रिया अखंडित सुरू राहील याची खात्री करणे अशी असणार आहे.

मतदान प्रक्रिया, कागदपत्रे, मार्गदर्शक तत्त्वांवर सखोल प्रशिक्षण

या प्रशिक्षण सत्राचे उद्घाटन आणि प्रमुख मार्गदर्शन निवडणूक निर्णय अधिकारी तथा तहसीलदार श्रीमती शितल सोलाट यांनी केले.

त्यांनी मतदान प्रक्रियेतील सूक्ष्म बाबी, निवडणूक आयोगाचे नियम, आचारसंहिता, मतदारांना सहाय्य करण्याची योग्य पद्धत, शंका व वाद निरसनाची प्रक्रिया यांवर सविस्तर माहिती दिली.

मतदान यंत्र म्हणजेच EVM आणि VVPAT हाताळणीचे प्रत्यक्ष प्रशिक्षण सहायक निवडणूक निर्णय अधिकारी श्री. अनिल भामरे यांनी घेतले. त्यांनी यंत्रांची तपासणी, सीलिंग, मॉक पोल, त्रुटी निवारण आणि मतदान केंद्रावरील कायदेशीर प्रक्रिया यांचे प्रात्यक्षिक सत्र कर्मचारी व अधिकाऱ्यांना दिले.

अतिरिक्त सहायक निवडणूक निर्णय अधिकारी श्रीमती स्वालिहा मालगावे यांनी मतदान केंद्रांवर वापरावयाच्या घोषणापत्रांचे नमुने, भरण्यात येणारी फॉरमॅट्स, दिवसअखेरीस तयार करावयाचे अहवाल, तसेच मतदान केंद्र अधिकाऱ्यांनी पाळावयाच्या शासकीय कार्यपद्धतीचे सखोल स्पष्टीकरण दिले.

मतदान कर्मचाऱ्यांची क्षमता तपासण्यासाठी ‘चाचणी परीक्षा’

प्रशिक्षणाच्या शेवटी उपस्थित सर्व मतदान कर्मचार्‍यांची चाचणी परीक्षा घेण्यात आली. यात मतदान प्रक्रिया, EVM वापर, आपत्कालीन परिस्थिती हाताळणी, मतदार मार्गदर्शन, कागदपत्रे भरणे यासंदर्भातील वस्तुनिष्ठ प्रश्न विचारण्यात आले.

या परीक्षेमुळे कर्मचार्‍यांची तयारी तपासली गेली असून निवडणूक दिवशी कोणतीही त्रुटी किंवा विलंब होऊ नये यासाठी प्रशासनाने ही पद्धत अवलंबली आहे.

2 डिसेंबर 2025 रोजी मतदान – संपूर्ण वाहतूक व साहित्य योजनेची आखणी

भडगाव नगरपरिषद सार्वत्रिक निवडणुकीसाठी मतदान 2 डिसेंबर 2025 रोजी सकाळी 7.30 ते सायंकाळी 5.30 या वेळेत होणार आहे.

मतदान साहित्य, EVM संच, VVPAT मशीन, मतदान केंद्रावरील फर्निचर, फॉरमॅट्स, शिक्के, नोंदवही या सर्व वस्तूंचे किट तयार करण्यात आले असून 1 डिसेंबर रोजी सर्व मतदान पथके तालुका क्रीडा संकुलातून मतदान केंद्रांवर रवाना होतील.

यासाठी प्रशासनाने आवश्यक त्या सर्व वाहनांची सोय केली असून वाहनांचे रूट चार्ट, लोडिंग प्रक्रिया आणि सुरक्षा व्यवस्थाही निश्चित करण्यात आली आहे.

3 डिसेंबर 2025 रोजी मतमोजणी — 60 कर्मचारी सज्ज, 7 टेबलांवर 7 ते 8 फेऱ्या

मतदानानंतरची सर्वात महत्वाची प्रक्रिया असलेल्या मतमोजणीचे काम 3 डिसेंबर 2025 रोजी सकाळी 10 वाजल्यापासून तालुका क्रीडा संकुल येथे सुरू होणार आहे.

मतमोजणीसाठी एकूण 60 कर्मचारी नियुक्त झाले असून EVM मतमोजणी 6 टेबलांवर, तर पोस्टल मतपत्रिकांची मतमोजणी 1 स्वतंत्र टेबलावर केली जाणार आहे.

एकूण 7 ते 8 फेऱ्यांमध्ये मतमोजणी होणार असून प्रत्येक फेरीत साधारण 3 ते 4 प्रभागांचे निकाल जाहीर होतील. मतमोजणी हॉलमध्ये सुरक्षा बंदोबस्त, मतमोजणी एजंट यांची बैठक व्यवस्था, सीसीटीव्ही नियंत्रण, मशीन पडताळणी व निकाल फीडिंग यांची पूर्वतयारीही युद्धपातळीवर सुरू आहे.

प्रशासन तयारीस कटिबद्ध — सर्व प्रक्रिया क्रीडा संकुलातूनच

या वर्षीची एक महत्त्वाची बाब म्हणजे मतदानापासून ते मतमोजणीपर्यंतचे सर्व कामकाज एकाच ठिकाणी— भडगाव तालुका क्रीडा संकुल—येथे पार पडणार आहे.

यामुळे कर्मचारी, अधिकारी, वाहतूक व्यवस्था, सुरक्षा आणि लॉजिस्टिक व्यवस्थापन अधिक सुलभ होणार असल्याचे प्रशासनाचा विश्वास आहे.

नगरपरिषदेचे नितीन पाटील यांनी माहिती देताना सांगितले की, “मतदान आणि मतमोजणी पारदर्शक, सुरक्षित आणि अडथळारहित पद्धतीने व्हावी यासाठी प्रशासनाने सर्व तयारी पूर्ण केली आहे. कर्मचारी प्रशिक्षण, साहित्य वाहतूक, सुरक्षा नियोजन, मतमोजणी हॉलची मांडणी या सर्व बाबींवर नजर ठेवली जात आहे.”

भडगाव प्रतिनिधी :-

भडगाव नगरपरिषद निवडणुकीची रणधुमाळी सुरु असताना शहरात शांतता,कायदा व सुव्यवस्थेची स्थिती अबाधित ठेवण्यासाठी भडगाव पोलिसांनी शनिवारी दिमाखदार रूट मार्च काढला.निवडणूक प्रक्रिया पारदर्शक व निर्विघ्न पार पडावी, तसेच नागरिकांमध्ये सुरक्षिततेची भावना निर्माण व्हावी,या उद्देशाने हा उपक्रम राबवण्यात आला.

रूट मार्चमध्ये भडगाव पोलिस ठाण्याचे ३ अधिकारी,३० पोलीस कर्मचारी,दंगानियंत्रण पथकाचे-१५ कर्मचारी, पुणे,दौड येथील-१६ एस. आर.पी.टिम,

८६ होमगार्ड कर्मचारी यांचा समावेश होता. सायंकाळी ६:०० वाजता भडगांव तहसिल कार्यालया समोरून पोलिस ठाण्यापासून मार्गक्रमणाला सुरुवात झाली.मेन रोड नगरदेवळा दरवाजा,रथ मार्ग नगरपालिके जवळुन मेढया मारुती पासुन टोणगांव,जयहिंद कॉलणी,महालक्ष्मी कॉलणी,दत्तनगर,बाळद रोड मार्ग महाराणा प्रताप चौक पारोळा चौफुली, पाचोरा चौफुली वरून, भडगांव पोलिस स्टेशन येथे समाप्त झाला तसेच ज्या ठिकाणी निवडणूक काळात अधिक गर्दी होते त्या सर्व संवेदनशील भागांतून पोलीस तुकड्यांनी पायी रूट मार्च करत.

स्थानिक नागरिकांनी पोलिसांच्या या उपक्रमाचे स्वागत केले. निवडणूक काळात शहरातील वातावरण शांत व सुरक्षित ठेवण्याचा पोलिसांचा प्रयत्न सर्वांसाठी आश्वासक असल्याचे नागरिकांनी सांगितले. बाजारपेठांमध्ये रूट मार्च पाहण्यासाठी लोकांनी उत्सुकता दाखवली. अनेक व्यापाऱ्यांनी पोलिसांना शुभेच्छा देत सहकार्य करण्याचे आश्वासन दिले.

पोलिसांनी या वेळी नागरिकांना कोणत्याही अफवांवर विश्वास न ठेवण्याचे, सोशल मीडियावर अपप्रचार टाळण्याचे आणि निवडणूक प्रक्रिया शांततेत पार पाडण्यासाठी प्रशासनाला सहकार्य करण्याचे आवाहन केले. कायदा मोडणाऱ्या किंवा गैरप्रकारात सहभागी होणाऱ्या व्यक्तींवर कठोर कारवाई केली जाईल, असा इशारा अधिकाऱ्यांनी दिला.

नगरपरिषद निवडणुका पारदर्शक, सुरक्षित आणि शांततेत पार पडाव्यात यासाठी पोलिस प्रशासन पुरेशा प्रमाणात सज्ज असल्याचे या रूट मार्चमधून स्पष्ट दिसले. पुढील काळातही शहरातील परिस्थितीवर पोलिस यंत्रणा सतत लक्ष ठेवणार असल्याची माहिती अधिकाऱ्यांनी दिली आहे.

भडगाव प्रतिनिधी :-

भडगाव नगरपरिषद निवडणुका अवघ्या काही दिवसांवर येऊन ठेपल्या असून शहरातील राजकीय वातावरण तापू लागले आहे. प्रभागनिहाय समीकरणे वेगाने बदलत असताना प्रभाग क्रमांक 11 मधील अपक्ष उमेदवार अविनाश पुंडलिक अहिरे यांच्या प्रचार सभेला मिळालेला उत्स्फूर्त प्रतिसाद विशेष चर्चेचा विषय ठरत आहे.

शनिवारी आयोजित करण्यात आलेल्या या सभेला स्थानिक नागरिक, महिला वर्ग, ज्येष्ठ मंडळी तसेच युवकांची मोठ्या प्रमाणात उपस्थिती पाहायला मिळाली. परिसरातील नागरिकांनी स्वयंस्फूर्तीने सभेला हजेरी लावल्यानं प्रभागातील निवडणूक रंगतदार होण्याची चिन्हे दिसू लागली आहेत.

“शब्दात दम आणि कारभारात पारदर्शकता” – अहिरे यांचा ठाम उच्चार

आपल्या मनोगतात बोलताना अविनाश अहिरे यांनी लोकाभिमुख भूमिकेचा पुनरुच्चार केला.

“शब्दात दम आणि कारभारात पारदर्शकता अत्यंत आवश्यक आहे. जनतेच्या अपेक्षा ओळखून प्रामाणिकपणे काम करण्याची माझी पूर्ण तयारी आहे,” असे ते म्हणाले.

अहिरे यांच्या या वक्तव्यास उपस्थितांनी टाळ्यांच्या गजरात प्रतिसाद देत पाठिंबा दर्शवला. सभेतील वातावरण उत्साहवर्धक होते.

‘कबशी’ चिन्हावर अपक्ष लढतीची तयारी

अविनाश अहिरे हे ‘कबशी’ या चिन्हावर अपक्ष उमेदवारी अर्ज भरण्याच्या तयारीत आहेत. गेल्या काही दिवसांपासून ते प्रभागातील सर्व वसाहतींमध्ये फिरून नागरिकांच्या समस्या जाणून घेत आहेत. पाणीपुरवठा, रस्त्यांची दुरुस्ती, कचरा व्यवस्थापन, आरोग्य सुविधा आणि स्थानिक युवकांसाठी रोजगाराची निर्मिती हे मुद्दे त्यांनी प्रभागातील मुख्य प्राधान्यक्रम म्हणून अधोरेखित केले आहेत.

प्रचार समितीच्या माहितीनुसार, आतापर्यंत अहिरे यांनी जवळपास प्रत्येक विभागात भेट देऊन स्थानिक प्रश्नांची प्राथमिक नोंद केली आहे.

नागरिकांचे थेट प्रश्न, अहिरे यांची तत्काळ दखल

सभेदरम्यान नागरिकांनी रस्त्यांवरील खड्डे, नळपाण्याची अनियमितता, वाढती वाहतूक कोंडी, गल्ली-बोळातील स्वच्छतेचा अभाव आदी मुद्द्यांवर स्पष्टपणे आवाज उठवला.

अहिरे यांनी प्रत्येक तक्रारीची नोंद घेत निवडून आल्यास प्राधान्याने या समस्या सोडवण्याचे आश्वासन दिले.

आगामी 2 दिवसांत घरभेटी, पदयात्रा आणि संवाद मेळावे बंद होतील

सभेनंतर प्रचार आणखी वेग घेणार असून पुढील दोन दिवसांत प्रभागात ताबडतोब संवाद मेळावे, घरोघरी भेटी तसेच पदयात्रांचे आयोजन करण्यात येणार आहे.

निवडणूक आचारसंहितेनुसार अधिकृत प्रचार 30 नोव्हेंबर रोजी थांबणार, तर 2 डिसेंबर रोजी मतदान होणार आहे.

भडगावची निवडणूक रंगतदार

दरम्यान, शहरातील इतर इच्छुक उमेदवारांकडूनही प्रचारात गती आल्याने भडगावातील राजकीय वातावरणात चुरस वाढली आहे. मतदारांमध्येही आगामी निवडणुकीबाबत उत्सुकता वाढत असून प्रभाग 11 मध्ये तगडी लढत होण्याची शक्यता निर्माण झाली आहे.