विल जॅक्सचे तडाखेबंद अर्धशतक; इंग्लंडचा इटलीवर २४ धावांनी थरारक विजय
विल जॅक्सचे तडाखेबंद अर्धशतक; इंग्लंडचा इटलीवर २४ धावांनी थरारक विजय
मुंबई (गुरुदत्त वाकदेकर) : आयसीसी पुरुष टी–२० विश्वचषक २०२६ मधील २९ व्या सामन्यात गट क मध्ये इंग्लंडने इटलीवर २४ धावांनी रोमहर्षक विजय मिळवला. ईडन गार्डन्सवर खेळल्या गेलेल्या या सामन्यात इंग्लंडने प्रथम फलंदाजी करत २० षटकांत ७ गडी गमावून २०२ धावांचा भक्कम डोंगर उभा केला. प्रत्युत्तरात इटलीने झुंजार लढत दिली, मात्र त्यांचा डाव २० षटकांत १७८ धावांत आटोपला.
नाणेफेक जिंकून प्रथम फलंदाजीचा निर्णय घेतलेल्या इंग्लंडला सुरुवातीस काही धक्के बसले. फिल सॉल्ट, जोस बटलर आणि जेकब बेथेल लवकर बाद झाले. मात्र टॉम बॅन्टन, सॅम करन आणि हॅरी ब्रूक यांनी संयमी खेळी करत डाव सावरला. अखेरीस विल जॅक्सने अवघ्या २२ चेंडूंमध्ये ३ चौकार आणि ४ षटकारांच्या मदतीने ५३ धावांची तडाखेबंद खेळी साकारत इंग्लंडला २०२ धावांपर्यंत नेले. जेमी ओव्हर्टनने १५ धावांची उपयुक्त साथ दिली.
२०३ धावांच्या आव्हानाचा पाठलाग करताना इटलीची सुरुवात अत्यंत खराब झाली. पहिल्याच षटकात दोन गडी बाद झाल्याने संघ दबावात आला. मात्र जस्टिन मोस्काने ४३ धावा करत डावाला सावरले. त्यानंतर बेन मॅनेंटीने अवघ्या २५ चेंडूंमध्ये ४ चौकार आणि ६ षटकारांसह ६० धावांची झंझावाती खेळी करत सामन्यात रंगत निर्माण केली. ग्रँट स्टुअर्टनेही ४५ धावांची आक्रमक खेळी केली. अखेरच्या षटकांपर्यंत सामना रंगतदार ठरला, मात्र इंग्लंडच्या गोलंदाजांनी संयम राखत विजय खेचून आणला.
इंग्लंडकडून जेमी ओव्हर्टनने ३ बळी घेत निर्णायक भूमिका बजावली. सॅम करननेही ३ गडी बाद करत इटलीच्या धावगतीवर अंकुश ठेवला. जोफ्रा आर्चरने सुरुवातीच्या षटकांत भेदक मारा करत २ बळी घेतले.
या सामन्यात अनेक विक्रमांची नोंद झाली. विल जॅक्सने टी–२० विश्वचषक २०२६ मधील आतापर्यंतचे सर्वात वेगवान अर्धशतक साकारले. त्याचा २४०.९१ चा स्ट्राइक रेट या स्पर्धेतील सर्वोच्च ठरला. इंग्लंडने या स्पर्धेत प्रथमच २०० पेक्षा अधिक धावसंख्या उभारण्याचा पराक्रम केला. तसेच, बेन मॅनेंटीने विश्वचषकातील इटलीकडून सर्वोच्च वैयक्तिक धावसंख्या नोंदवत इतिहास रचला.
या विजयासह इंग्लंडने गट क मधील आपली स्थिती मजबूत केली असून उपांत्य फेरीकडे भक्कम पाऊल टाकले आहे. इटलीने पराभव पत्करला असला तरी त्यांच्या झुंजार खेळीने प्रेक्षकांची मने जिंकली. हा सामना उच्च दर्जाच्या टी–२० क्रिकेटचा उत्तम नमुना ठरला.
