पाचोरा प्रतिनिधी :-
पाचोरा नगरपरिषद प्रभाग क्रमांक ७ चे नवनिर्वाचित नगरसेवक आदरणीय आयु. प्रवीणभाऊ ब्राह्मणे यांची पाचोरा नगरपरिषदेच्या शिक्षण सभापतीपदी निवड करण्यात आली आहे. त्यांच्या या निवडीमुळे शहरातील शिक्षण क्षेत्राला नवी दिशा व चालना मिळेल, अशी अपेक्षा सर्व स्तरातून व्यक्त होत आहे.
नगरपरिषदेच्या झालेल्या बैठकीत सर्वानुमते त्यांची निवड जाहीर करण्यात आली. शिक्षण क्षेत्राबाबतची त्यांची सकारात्मक भूमिका, विद्यार्थीकेंद्रित विचारसरणी आणि सामाजिक बांधिलकी लक्षात घेऊन नगरपरिषदेकडून त्यांच्यावर ही महत्त्वाची जबाबदारी सोपविण्यात आली आहे.
निवडीनंतर प्रतिक्रिया व्यक्त करताना आयु. प्रवीणभाऊ ब्राह्मणे यांनी सांगितले की, शहरातील शाळांच्या मूलभूत सुविधा सक्षम करणे, विद्यार्थ्यांच्या शैक्षणिक गुणवत्तेत वाढ करणे, तसेच शिक्षक, पालक व प्रशासन यांच्यात समन्वय साधून निर्णय घेणे यावर विशेष भर दिला जाईल. गरजू विद्यार्थ्यांसाठी विविध उपक्रम राबविणे, शाळांमधील समस्या मार्गी लावणे आणि आधुनिक शिक्षण पद्धतींचा अवलंब करण्याचा मानसही त्यांनी व्यक्त केला.
या निवडीबद्दल पाचोरा शहरातील नागरिक, सहकारी नगरसेवक, शिक्षकवर्ग तसेच समर्थकांकडून आयु. प्रवीणभाऊ ब्राह्मणे यांच्यावर अभिनंदनाचा वर्षाव होत आहे. त्यांच्या कार्यकाळात पाचोरा शहरातील शिक्षण व्यवस्थेला नवे बळ मिळेल, असा विश्वास व्यक्त करत सर्वत्र त्यांना शुभेच्छा दिल्या जात आहेत.
