भडगाव नगरपरिषद निवडणूक २०२५  नामनिर्देशनाचा सहावा दिवस उत्साहात पार.!!!

भडगाव प्रतिनिधी :–

आगामी भडगाव नगरपरिषद सार्वत्रिक निवडणूक २०२५ साठी नामनिर्देशन दाखल करण्याचा आज सहावा दिवस असून, आज दि. १५ नोव्हेंबर २०२५ रोजी नगराध्यक्षा आणि नगरसेवक पदाकरिता मिळालेल्या अर्जांची निवडणूक विभागाने माहिती जाहीर केली.

नगराध्यक्षा पदासाठी दोन अर्ज दाखल

आजच्या सहाव्या दिवशी नगराध्यक्षा पदासाठी एकूण २ अर्ज दाखल झाले असून उमेदवार पुढीलप्रमाणे आहेत:

1. मालचे रेखा प्रदीप (शिवसेना)

2. मालचे लताबाई अजय (अपक्ष)

यामुळे नगराध्यक्षा पदाच्या निवडणुकीत थेट दोन उमेदवारांमध्ये रंगतदार सामना होण्याची शक्यता निर्माण झाली आहे.

नगरसेवक पदासाठी आज ११ नामनिर्देशन अर्ज दाखल

आज विविध प्रभागांतून नगरसेवक पदाकरिता एकूण ११ अर्ज प्राप्त झाले. त्यामध्ये शिवसेना, भाजपा तसेच अपक्ष उमेदवारांचा समावेश असून आज दाखल झालेले उमेदवार पुढीलप्रमाणे—

प्रभाग १-अ: मालचे लताबाई अजय (भाजपा)

प्रभाग १-ब: नरवाडे गणेश काशीनाथ (शिवसेना)

प्रभाग ६-ब: पाटील लखीचंद प्रकाश (शिवसेना)

प्रभाग ७-अ: परदेशी नीता गणेश (शिवसेना)

प्रभाग ७-ब: शेख खलील शेख अजीज (शिवसेना)

प्रभाग ८-अ: पाटील समीक्षा लखचंद (शिवसेना)

प्रभाग १०-अ: पाटील विठ्ठल कौतिक (भाजपा)

प्रभाग १०-अ: पाटील जितेंद्र शांताराम (शिवसेना)

प्रभाग १०-ब: पाटील ज्योति जितेंद्र (शिवसेना)

प्रभाग ११-अ: अहिरे देवाजी बापू (शिवसेना)

प्रभाग ११-ब: भोई कल्पनाबाई जगन (शिवसेना)

एकूण अर्जांची संख्या वाढली

कालपर्यंत दाखल झालेल्या अर्जांसह आजपर्यंत एकूण आकडे पुढीलप्रमाणे—

नगराध्यक्षा पदाकरिता उमेदवार: २

नगराध्यक्षा पदाकरिता अर्ज: २

नगरसेवक पदाकरिता उमेदवार: १८

नगरसेवक पदाकरिता अर्ज: १९

नगरसेवक पदासाठी उमेदवारांची संख्या वाढत असून शिवसेना आणि भाजपामध्ये प्रभागनिहाय चुरस वाढताना दिसत आहे. नामनिर्देशन सादर करण्याचा कालावधी संपेपर्यंत अजून काही महत्त्वाचे उमेदवार अर्ज दाखल करण्याची शक्यता नाकारता येत नाही.

भडगाव नगरपरिषदेसाठी प्रभाग 1-ब मधून गणेश काशिनाथ नरवाडे यांची अधिकृत उमेदवारी जाहीर

भडगाव प्रतिनिधी :-

भडगाव नगरपरिषद निवडणुकीची रणधुमाळी दिवसेंदिवस रंगतदार होत असताना, प्रभाग क्र. 1-ब मधून श्री. गणेश काशिनाथ नरवाडे यांना अधिकृत उमेदवार म्हणून घोषित करण्यात आले आहे. पक्षाच्या स्थानिक पदाधिकारी व कार्यकर्त्यांच्या उपस्थितीत झालेल्या बैठकीत ही घोषणा करण्यात आली. या घोषणेने प्रभागातील निवडणूक लढतीला अचानक वेग आल्याची प्रतिक्रिया स्थानिक राजकीय वर्तुळातून उमटत आहे.

घोषणेनंतर बोलताना पक्षातील पदाधिकाऱ्यांनी सांगितले की “सेवा हाच धर्म – विकास हाच संकल्प” या भूमिकेतून नागरिकांना विश्वासार्ह पर्याय देण्याचा पक्षाचा मानस आहे. प्रभागातील मूलभूत सुविधा, रस्ते-गटार व्यवस्था, पाणीपुरवठा, स्वच्छता, तसेच दैनंदिन नागरी समस्यांच्या निराकरणासाठी कटीबद्ध उमेदवार उभा करण्याचा निर्णय पक्षाने घेतल्याचे पदाधिकाऱ्यांनी स्पष्ट केले.

श्री. गणेश काशिनाथ नरवाडे हे गेल्या अनेक वर्षांपासून सामाजिक कार्यामध्ये सक्रिय आहेत. स्थानिक पातळीवर राबविण्यात आलेल्या विविध उपक्रमांत त्यांनी सातत्याने सहभाग नोंदविला असून नागरिकांमध्ये त्यांची ओळख एक सक्रिय, सहज उपलब्ध असणारा कार्यकर्ता म्हणून आहे. आगामी निवडणुकीच्या पार्श्वभूमीवर ते प्रभागातील घराघरात जाऊन नागरिकांशी संवाद साधत असून स्थानिक प्रश्न व विकासकामांबाबतच्या मागण्या जाणून घेत आहेत.

पक्षाकडून मिळालेल्या माहितीनुसार, लवकरच प्रचार दौऱ्यांची औपचारिक सुरुवात केली जाणार आहे. नागरिक भेटी, सभासमारंभ, स्थानिक समस्यांचे दस्तऐवजीकरण आणि प्रभागाच्या विकासनकाशाला आकार देण्याची प्रक्रिया येत्या काही दिवसांत सुरू होणार आहे.

दरम्यान, भडगाव नगरपरिषद निवडणूक ही प्रतिष्ठेची समजली जात असल्याने विविध पक्षांच्या हालचालींना गती आली आहे. उमेदवार निश्चिती, स्थानिक राजकीय समीकरणे, जात-धर्मीय गणिते आणि मतदारांच्या अपेक्षा यामुळे निवडणूक वातावरण तापत आहे. लवकरच इतर पक्षांकडूनही अधिकृत उमेदवारांची घोषणा होण्याची शक्यता असून यामुळे निवडणुकीतील स्पर्धा आणखी चुरशीची होण्याची चिन्हे दिसत आहेत.

भडगावच्या नागरी विकासासाठी आगामी निवडणूक कोणता कल निर्माण करते, याकडे सर्वांचे लक्ष लागले आहे.

१६वी राष्ट्रीय थाई बॉक्सिंग स्पर्धेत भडगाव–चाळीसगाव तालुक्याचा दणदणीत विजय.१० खेळाडूंनी जिंकली सुवर्णपदके महाराष्ट्राचा झेंडा उंचावला.!!!

भडगाव प्रतिनिधी :-

अमृतसर (पंजाब) येथे नुकत्याच पार पडलेल्या १६व्या राष्ट्रीय थाई बॉक्सिंग फेडरेशन आयोजित ऑल इंडिया थाई बॉक्सिंग स्पर्धेत भडगाव आणि चाळीसगाव तालुक्यातील खेळाडूंनी दैदिप्यमान सोनेरी कामगिरी करत एकच रचली आहे. दिनांक ७ ते ९ नोव्हेंबर २०२५ दरम्यान घेण्यात आलेल्या या प्रतिष्ठेच्या स्पर्धेत देशभरातील तब्बल १६ राज्यांमधील शेकडो स्पर्धकांनी सहभाग नोंदवला होता. अशा भव्य राष्ट्रीय मंचावर जिल्ह्यातील १०ही खेळाडूंनी सुवर्णपदक पटकावून महाराष्ट्राचा मान उंचावला.

राष्ट्रीय स्पर्धेत भडगाव–चाळीसगावचा दबदबा

स्पर्धेत महाराष्ट्र, ओडिशा, आसाम, गुजरात, पंजाब, जम्मू-कश्मीर, मध्य प्रदेश, राजस्थान, केरळ, चंदीगड इत्यादी राज्यांतील बलाढ्य खेळाडूंनी सहभाग घेतला होता. या कठीण स्पर्धेत भडगाव आणि चाळीसगाव तालुक्यातील खेळाडूंनी उत्कृष्ट तंत्र, दमदार फिटनेस आणि शिस्तबद्ध खेळ यांच्या जोरावर सर्वांचे लक्ष वेधून घेत ‘गोल्ड रेन’ केली.

सुवर्ण पदक विजेते खेळाडू

चाळीसगाव तालुका – सुवर्ण विजेते

1. इझान जुबैर रंगरेज — सुवर्ण पदक

2. खिझर हबीब शेख — सुवर्ण पदक

3. मुजाक्किर मुशरीफ खान — सुवर्ण पदक

4. ओम गौतम गोयर — सुवर्ण पदक

5. हामज़ा सिराज शेख — सुवर्ण पदक

भडगाव तालुका – सुवर्ण विजेते

1. अबूजर मोबिन मिर्झा — सुवर्ण पदक

2. जुनेद खान शाकीर खान — सुवर्ण पदक

3. चेतन भैय्यासाहेब भोई — सुवर्ण पदक

4. प्रतीक सतिश दाभाडे — सुवर्ण पदक

5. आर्यन निलेश ब्राह्मणकर — सुवर्ण पदक

या सर्व सुवर्णविजेत्यांनी आपल्या खेळातून खान्देश आणि महाराष्ट्राचे नाव राष्ट्रीय पातळीवर उज्ज्वल केले आहे.

असोसिएशनची भक्कम साथ – संघटन आणि नियोजनाचे कौतुक

या अविस्मरणीय यशामागे चाळीसगाव थाई बॉक्सिंग असोसिएशनचे सचिव आयान अतिक खान यांनी निर्णायक नियोजन, संघटन आणि मार्गदर्शनाची जबाबदारी काटेकोरपणे पार पाडली.

तसेच शाहरुख नजीर मण्यार यांनी कोच म्हणून खेळाडूंच्या तांत्रिक क्षमतेवर मेहनत घेत स्पर्धेसाठी योग्य प्रकारे तयार केले.

खेळाडूंना जळगाव जिल्हा थाई बॉक्सिंग असोसिएशन व भडगाव तालुका असोसिएशनकडून सुद्धा मोठा पाठिंबा मिळाला. जिल्हा अध्यक्ष हाजी जकिर कुरेशी, उपाध्यक्ष शाम पाटील, तसेच पदाधिकारी डॉ. वसीम मिर्झा, सौरभ पाटील, संतोष पाटील, सौरभ देशमुख, अजगर खान, हाजी खलील शेख यांनी खेळाडूंना सतत प्रोत्साहन दिले.

मुख्य प्रशिक्षक अबरार खान यांचे योगदान विशेष

खेळाडूंना राष्ट्रीय स्तरावरील तंत्र, फाईट स्टाईल, फिटनेस, मानसिक तयारी आणि स्पर्धेतील दबाव सांभाळण्याचे प्रशिक्षण मुख्य प्रशिक्षक अबरार खान (सहसचिव – थाई बॉक्सिंग महाराष्ट्र) यांनी दिले. त्यांच्या सातत्यपूर्ण मार्गदर्शनामुळेच खेळाडूंना राष्ट्रीय स्तरावर सुवर्णपदके पटकावण्याचे मोठे बळ मिळाले.

खेळाडूंनी घरी आणले गौरव – सर्वत्र कौतुकाचा वर्षाव

भडगाव व चाळीसगाव तालुक्यातील खेळाडूंनी मिळवलेल्या या अभूतपूर्व यशामुळे दोन्ही तालुक्यात आनंदाचे वातावरण पसरले आहे. ग्रामस्थ, संस्था, प्रशिक्षक आणि पालकांकडून खेळाडूंवर कौतुकाचा वर्षाव होत आहे.

राष्ट्रीय पातळीवर महाराष्ट्राचे नाव उज्ज्वल केल्याबद्दल सर्व सुवर्ण पदक विजेत्यांचे सर्व स्तरातून अभिनंदन केले जात आहे.

निस्वार्थ सेवा आणि सामाजिक बांधिलकी — योजनाताई पाटील प्रभाग ९ मधून निवडणूक रिंगणात.!!!

भडगाव प्रतिनिधी :-

भडगाव तालुक्यात सामाजिक कार्याची भक्कम परंपरा निर्माण करणाऱ्या मा. नगरसेविका सौ. योजनाताई दत्तात्रय पाटील यांनी गेल्या काही वर्षांत केलेल्या लोकाभिमुख कामांमुळे प्रभाग क्रमांक ९ मध्ये त्यांची ओळख विश्वासार्ह व सक्रिय जननेत्या म्हणून झाली आहे. निस्वार्थ सेवा, सामाजिक बांधिलकी आणि नागरिकांशी सतत जोडून राहण्याची त्यांची कामाची पद्धत विशेषत्वाने पुढे येते.

निराधार, गरजू, वंचित अशा घटकांसोबतच विद्यार्थी, महिला आणि वरिष्ठ नागरिकांच्या समस्यांवर योजनाताईंनी सातत्याने लक्ष केंद्रित केले आहे. शासकीय कार्यालयांशी समन्वय साधून त्वरित मदत उपलब्ध करून देण्याचा त्यांचा ध्यास अनेकांना दिलासा देणारा ठरला आहे.

प्रभागातील रस्ते, पाणीपुरवठा, स्वच्छता, आरोग्य आणि इतर मूलभूत सुविधा यांसंदर्भात येणाऱ्या तक्रारींवर त्यांनी स्वतः स्थळी भेट देऊन उपाययोजना केल्या. संबंधित विभागांशी चर्चा करून अनेक तातडीच्या समस्यांचे निवारण केल्याने नागरिकांमध्ये त्यांच्या कार्याबाबत समाधान व्यक्त होत आहे.

महिला सक्षमीकरण, आरोग्य तपासणी शिबिरे, विद्यार्थ्यांना शैक्षणिक साहित्य, तसेच नागरिकांच्या अडचणींसाठी कोणत्याही वेळी उपलब्धता या उपक्रमांमुळे त्यांचा लोकसंपर्क अधिक दृढ झाला आहे.

येत्या नगरपरिषद निवडणुकीत सौ. योजनाताई पाटील प्रभाग क्रमांक ९ मधून उमेदवारी अर्ज करीत असून, त्यांच्या कार्याचा आलेख व साधी, सहज उपलब्ध राहण्याची कार्यशैली यामुळे नागरिकांकडून उत्साहपूर्ण प्रतिसाद मिळत असल्याचे चित्र दिसत आहे. सध्या त्यांच्या जनसंपर्क मोहिमेला गती येत असून विविध समाजघटकांचा पाठिंबा त्यांना लाभत आहे.

सौ. पाटील यांनी, “प्रभागाचा सर्वांगीण विकास आणि सर्वसामान्य नागरिकांच्या समस्या प्राधान्याने सोडवण्याचे काम अखंडपणे करणार,” असे सांगितले आहे. त्यांच्या सामाजिक बांधिलकीच्या पार्श्वभूमीवर प्रभाग क्रमांक ९ मधील निवडणूक यंदा रंगतदार ठरण्याची शक्यता व्यक्त केली जात आहे.

राज्य निवडणूक आयोगाचा महत्त्वाचा निर्णय : नगरपरिषद व नगरपंचायती निवडणुकांसाठी ऑनलाइनसोबत ऑफलाइन नामनिर्देशनालाही परवानगी.!!!

राज्यातील २४६ नगरपरिषदा आणि ४२ नगरपंचायतींच्या सार्वत्रिक निवडणुका २०२५ संदर्भात राज्य निवडणूक आयोगाने उमेदवारांना मोठा दिलासा देणारा महत्त्वपूर्ण निर्णय जाहीर केला आहे. नामनिर्देशन प्रक्रिया आता ऑनलाईनसोबत ऑफलाइन पद्धतीनेही करण्यास परवानगी देण्यात आली आहे. उमेदवारांकडून सतत होत असलेल्या तक्रारी आणि वाढत्या तांत्रिक अडचणींचा विचार करून हा निर्णय घेण्यात आला आहे.

ऑनलाईन प्रणालीमध्ये अडचणी वाढल्या

राज्य निवडणूक आयोगाने ०४ नोव्हेंबर २०२५ रोजी जाहीर केलेल्या कार्यक्रमानुसार उमेदवारांना नामनिर्देशनपत्रे केवळ ऑनलाईन पद्धतीने स्वीकारण्याची व्यवस्था करण्यात आली होती. मात्र, राज्यभरातून ऑनलाइन पोर्टलमध्ये लॉग-इन न होणे, दस्तऐवज अपलोड करताना त्रुटी येणे, सबमिशनमध्ये समस्या निर्माण होणे अशा मोठ्या प्रमाणात तांत्रिक अडचणी समोर येत होत्या. निवडणुकीसाठी आता फक्त दोन दिवसांचा कालावधी उरला असताना या समस्या अधिक गंभीर स्वरूप धारण करत असल्याचे निदर्शनास आले.

आमदार किशोर आप्पा पाटील यांच्या तक्रारीची दखल

पाचोरा-भडगाव मतदारसंघाचे आमदार किशोर आप्पा पाटील यांनी देखील या समस्येबाबत राज्य निवडणूक आयोगाकडे ईमेलद्वारे अधिकृत तक्रार नोंदविली होती. उमेदवारांना न्याय्य संधी मिळावी आणि तांत्रिक अडचणींमुळे कोणाचाही नामनिर्देशनाचा हक्क बाधित होऊ नये, अशी मागणी त्यांनी आयोगाकडे केली होती. या तक्रारीलाही आयोगाने सकारात्मक दृष्टीने विचारात घेतल्याचे दिसत आहे.

उमेदवारांना मिळणार दुहेरी सुविधा

आयोगाने जाहीर केलेल्या विशेष निर्देशानुसार दि. १५, १६ आणि १७ नोव्हेंबर २०२५ या तीन दिवसांत

सकाळी ११.०० ते दुपारी ३.००

या वेळेत उमेदवारांना

✔️ ऑनलाईन तसेच

✔️ ऑफलाइन

दोन्ही मार्गाने नामनिर्देशनपत्रे आणि आवश्यक कागदपत्रे सादर करण्याची परवानगी राहणार आहे. विशेष बाब म्हणजे १६ नोव्हेंबर हा सार्वजनिक सुट्टीचा दिवस असला तरीही कार्यालये नामनिर्देशनासाठी खुली राहतील, असे स्पष्ट करण्यात आले आहे.

स्थानिक प्रशासनाला तातडीचे आदेश

राज्य निवडणूक आयुक्तांनी सर्व जिल्हाधिकारी, निवडणूक निर्णय अधिकारी आणि स्थानिक स्वराज्य संस्थांना तातडीच्या सूचना दिल्या आहेत. उमेदवारांच्या सोयीसाठी कार्यालयांमध्ये अतिरिक्त कर्मचारी, तांत्रिक सहाय्य, क्यू-व्यवस्था, मार्गदर्शक अधिकारी आदी सर्व आवश्यक सुविधा उपलब्ध करून देण्याचे निर्देशही देण्यात आले आहेत.

उमेदवारांना दिलासा; प्रक्रियेत पारदर्शकता

ऑनलाईन प्रणालीवरील वाढत्या तांत्रिक भारामुळे अनेक उमेदवार अडचणीत सापडले होते. ऑफलाइन नामनिर्देशनाला परवानगी दिल्यामुळे आता उमेदवारांना अधिक सुरक्षित व सोपी पर्याय उपलब्ध झाला आहे. या निर्णयामुळे नामनिर्देशन प्रक्रिया अधिक पारदर्शक, सुलभ आणि सर्वसमावेशक होईल, असा विश्वास व्यक्त केला जात आहे.

भडगाव नगरपरिषद निवडणूक २०२५ पाचव्या दिवशी अर्ज दाखल प्रक्रियेला मर्यादित प्रतिसाद

नगराध्यक्षा पदाकरिता एकही अर्ज नाही; नगरसेवक पदासाठी ५ अर्ज दाखल

भडगाव प्रतिनिधी :-

आगामी भडगाव नगरपरिषद सार्वत्रिक निवडणूक २०२५ च्या पार्श्वभूमीवर आज दि. १४ नोव्हेंबर २०२५ रोजी उमेदवारी अर्ज दाखल करण्याच्या प्रक्रियेला सुरूवात राहिली असली तरी पाचव्या दिवशीही वातावरण शांतच दिसून आले. विशेष म्हणजे, नगराध्यक्षा पदाकरिता आजदेखील एकही अर्ज दाखल झाला नाही, तर नगरसेवक पदासाठी ५ उमेदवारांनी एकूण ५ अर्ज दाखल केले.

निवडणूक विभागाकडून सायंकाळी जारी केलेल्या अधिकृत अहवालानुसार प्रभागनिहाय अर्जांची नोंद पुढीलप्रमाणे झाली:

आज (१४ नोव्हेंबर) दाखल झालेले नगरसेवक पदाचे अर्ज

प्रभाग क्र. ८-अ

पाटील पुनम प्रशांत — २ अर्ज

प्रभाग क्र. ९-ब

पाटील योजना दत्तात्रय — १ अर्ज

प्रभाग क्र. १-ब

पाटील संतोष अर्जुन — १ अर्ज

प्रभाग क्र. ११-ब

भोई पुष्पाबाई अशोक — १ अर्ज

कालपर्यंतचे व आजचे मिळून एकूण अर्ज

नगराध्यक्षा पदाकरिता एकूण अर्ज : ०

नगराध्यक्षा पदासाठी एकूण उमेदवार : ०

नगरसेवक पदाकरिता एकूण अर्ज : ६

नगरसेवक पदासाठी एकूण उमेदवार : ५

निवडणूक वातावरणात ‘प्रतीक्षा’ आणि ‘समन्वय’चे संकेत

नगराध्यक्षा पदासाठी एकही अर्ज न दाखल होणे हे भडगावमधील राजकीय चर्चांचे प्रमुख केंद्र बनले आहे. स्थानिक नेत्यांमध्ये अद्याप अंतिम तडजोड, उमेदवार निश्चिती किंवा आंतर्गत राजकीय समन्वय सुरू असल्याची चर्चा राजकीय वर्तुळात आहे. त्यामुळे पुढील दोन दिवसांत मोठे चेहरे किंवा नवे दावेदार समोर येण्याची शक्यता व्यक्त केली जात आहे.

नगरसेवक पदासाठी दाखल झालेले अर्जही प्रभागनिहाय मर्यादित असून, अनेक संभाव्य उमेदवार अजूनही परिस्थितीचा अंदाज घेत असल्याचे दिसत आहे.

पुढील काही दिवस निर्णायक

उमेदवारी अर्ज दाखल करण्यासाठी अद्याप काही दिवसांची मुदत शिल्लक आहे. राजकीय गट, पॅनेल आणि स्वतंत्र उमेदवार हातात असलेली पत्ते अद्याप उघड करत नसल्याने शेवटच्या टप्प्यात अर्जांची संख्या लक्षणीयरीत्या वाढेल, अशी अपेक्षा व्यक्त केली जात आहे.

पिंपरखेड येथे पाण्यात बुडून तरुणाचा मृत्यू.!!!

भडगाव प्रतिनिधी :-

भडगाव तालुक्यातील पिंपरखेड गावात घडलेल्या दुर्दैवी घटनेने परिसरात हळहळ व्यक्त केली जात आहे. गावातील वाल्मीक संजय हयाळींगे (वय २७) हा तरुण पाण्यात बुडाल्याने मृत झाल्याची घटना दि. १४ रोजी सकाळी सुमारास ७ वाजता उघडकीस आली.

मिळालेल्या माहितीनुसार, गावाजवळील नदीकाठी काही नागरिकांना पाण्यात एक मृतदेह आढळून आला. त्यानंतर गावाचे पोलीस पाटील भाईदास महाजन यांनी तत्काळ भडगाव पोलिसांना याबाबत कळविले. पोलिसांनी घटनास्थळी धाव घेऊन पंचनामा केला. प्राथमिक तपासात हा अकस्मात मृत्यू असल्याचे निदर्शनास आले असून, भडगाव पोलीस स्टेशनमध्ये अकस्मात मृत्यूची नोंद करण्यात आली आहे.

दरम्यान, मृतदेह भडगाव ग्रामीण रुग्णालयात दाखल करण्यात आला असता, तेथील डॉक्टरांनी वाल्मीक हयाळींगेला मृत घोषित केले. पुढील तपासासाठी शवविच्छेदन करून मृतदेह नातेवाईकांच्या ताब्यात देण्यात आला.

या घटनेने पिंपरखेड गावात शोककळा पसरली असून, तरुणाच्या अकस्मात निधनामुळे सर्वत्र हळहळ व्यक्त केली जात आहे. घटनेचा पुढील तपास पोहेकाे. ज्ञानेश्वर पाटील हे करीत आहेत.

भडगाव ते वाडे रस्त्याच्या दुरुस्तीचे काम करावे.अन्यथा दि. १७ रोजी भडगाव येथे ग्रामस्थांसह उपोषण. पञकार श्री. अशोकबापु परदेशी यांचे पोलीस प्रशासनाला निवेदन.!!!

भडगाव प्रतिनिधी :-

भडगाव ते वाडे रस्त्याच्या दुरुस्तीच्या कामाच्या मागणीबाबत दि. ३ रोजी अभियंता सो, सार्वजनिक बांधकाम विभागास उपोषण करण्याबाबत निवेदन दिलेले आहे. माञ सार्वजनिक बांधकाम विभागाने दखल घेतलेली नाही. त्यानुसार भडगाव ते वाडे रस्त्याच्या दुरुस्तीच्या कामासाठी मागणीसाठी दि. १७ रोजी सोमवारी सकाळी ११ वाजता भडगाव तहसिल कार्यालयासमोर उपोषणास बसण्यासाठी परवानगी मिळणेबाबत पञकार श्री. अशोकबापु परदेशी यांनी दि. १४ रोजी शुक्रवारी भडगाव पोलीस स्टेशनचे पोलीस निरीक्षक श्री. महेश शर्मा साहेब यांना भेटुन निवेदन देण्यात आले आहे.

भडगाव पोलीस स्टेशनला दिलेल्या निवेदनात म्हटले आहे कि, भडगाव ते वाडे या रस्त्यावर ठिकठिकाणी छोटया मोठया खड्डयांचे मोठया प्रमाणात जाळे पसरलेले आहे. भडगाव ते वाडे दरम्यान भडगाव ते कोठली, कोठली ते कनाशी, गोंडगाव ते वाडे या दरम्यान रस्त्यावर पाऊसाच्या पाण्यामुळे मोठया प्रमाणात खड्डे पडल्याने वाहनधारकांना वाहने चालवितांना मोठया ञासाचे ठरतांना दिसत आहे. वाहने पंक्चर होणे. वाहनांचे छोटे अपघात होतांना दिसत आहेत. याकडे सार्वजनिक बांधकाम विभागाचे सोयीस्कर दुर्लक्ष झाले आहे. तरी सार्वजनिक बांधकाम विभागाने भडगाव ते वाडे या रस्त्याच्या खड्डयांची डागडुजीचे काम करावे. अन्यथा भडगाव तहसिल कार्यालयासमोर ग्रामस्थांसह उपोषणास बसु. या आशयाचे निवेदन दि. ३/११/२०२५ रोजी आम्ही सार्वजनिक बांधकाम विभाग भडगाव यांना दिलेले होते. माञ बांधकाम प्रशासनाने या निवेदनाची दखल न घेतल्याने भडगाव ते वाडे या रस्त्याच्या डागडुजी दुरुस्तीचे काम तात्काळ सुरु करण्यात यावे. अन्यथा आम्ही ग्रामस्थांसह भडगाव तहसिल कार्यालयासमोर दि. १७ रोजी सोमवारी सकाळी ११ वाजता उपोषणास बसणार आहोत. याची प्रशासनाने दखल घ्यावी. ही विनंती. असेही शेवटी निवेदनात नमुद केलेले आहे. या निवेदनावर पञकार श्री. अशोकबापु परदेशी यांची सही आहे.

भडगाव पोलीस स्टेशनला निवेदन दिल्यानंतर पोलीस निरीक्षक श्री. महेश शर्मा साहेबांशी चर्चा झाली. श्री. महेश शर्मा साहेबांनी तात्काळ याबाबत आपण सार्वजनिक बांधकाम विभागास लेखी पञ पाठवित आहोत असे सांगीतले. तसेच श्री. महेश शर्मा साहेबांनी तात्काळ भडगाव सार्वजनिक बांधकाम विभागाचे अभियंता श्री. गणेश पाटील यांचेशी या बाबत मोबाईलवरुन चर्चा केली. अभियंता श्री. गणेश पाटील साहेबांनीही आम्ही तात्काळ भडगाव ते वाडे या संपुर्ण रस्त्याचे खड्डे बुजुन डागडुजीचे कामाला सुरुवात करु असे आश्वासन दिलेले आहे. बांधकाम प्रशासनाचे व पोलीस प्रशासनाचे मनापासुन आभार.

परंतु रस्त्याच्या कामाला लगेच सुरुवात करा अशी माझी भडगाव,नवे वढधे, जुने वढधे, कोठली, देव्हारी, कनाशी, बोदर्डे, निंभोरा, लोण पिराचे, बोरनार, गोंडगाव, दलवाडे, घुसर्डी, सावदे, बांबरुड प्र. ब, नावरे, वाडे, टेकवाडे बुद्रुक आदि गावातील ग्रामस्थ, प्रवाशी, विदयार्थी वर्गातुन आहे.