फरहानचा झंझावात, पाकिस्तानचा अमेरिकेवर ३२ धावांनी दणदणीत विजय
मुंबई (गुरुदत्त वाकदेकर) : कोलंबोतील सिंघलीज स्पोर्ट्स क्लब मैदानावर झालेल्या आयसीसी पुरुष टी-२० विश्वचषक २०२६ मधील बाराव्या सामन्यात गट अ मध्ये पाकिस्तानने अमेरिकेचा ३२ धावांनी पराभव केला. साहिबजादा फरहानच्या आक्रमक खेळीमुळे पाकिस्तानने हा सामना आपल्या नावावर केला.
नाणेफेक जिंकून प्रथम फलंदाजी स्वीकारलेल्या पाकिस्तानने २० षटकांत ९ गडी गमावून १९० धावा केल्या. साहिबजादा फरहानने ४१ चेंडूंत ७३ धावांची जबरदस्त खेळी साकारली. त्याने ६ चौकार आणि ५ षटकार ठोकले. बाबर आझमने ३२ चेंडूंत ४६ धावा करत डावाला स्थैर्य दिले. शादाब खानने १२ चेंडूंत ३० धावांची झंझावाती खेळी केली. अमेरिकेकडून शॅडली व्हॅन स्काल्कविकने ४ बळी घेत प्रभावी गोलंदाजी केली.
१९१ धावांच्या आव्हानाचा पाठलाग करताना अमेरिकेची सुरुवात समाधानकारक झाली. शायन जहाँगीरने ३४ चेंडूंत ४९ धावा केल्या. शुभम रंजनने ३० चेंडूंत ५१ धावांची आक्रमक खेळी साकारली. मिलिंद कुमारने २९ धावांचे योगदान दिले. मात्र, मधल्या फळीत नियमित अंतराने पडलेल्या विकेट्समुळे अमेरिकेचा डाव ढासळला. अमेरिका २० षटकांत ८ गडी गमावून १५८ धावांपर्यंत मजल मारू शकली.
पाकिस्तानकडून उस्मान तारीकने ३, शादाब खानने २, तर अबरार अहमद, मोहम्मद नवाज आणि शाहीन आफ्रिदी यांनी प्रत्येकी १ बळी घेतले.
या विजयासह पाकिस्तानने गट अ मधील आपले स्थान अधिक भक्कम केले. साहिबजादा फरहानच्या अष्टपैलू कामगिरीसाठी त्याला सामनावीर पुरस्काराने गौरविण्यात आले. हा विजय पाकिस्तानसाठी आत्मविश्वास वाढवणारा ठरला.
