भडगाव उपबाजारात शेतमालाचा जाहीर लिलाव सुरू; शेतकऱ्यांना बाजारभावाचा फायदा
पाचोरा , दि. २७ (प्रतिनिधी) – पाचोरा-भडगाव कृषि उत्पन्न बाजार समितीच्या भडगाव येथील उपबाजार आवारात रब्बी हंगामातील भुसार शेतमालाच्या जाहीर लिलावास आजपासून प्रारंभ करण्यात आला. यामुळे शेतकऱ्यांना स्पर्धात्मक दर मिळण्यास मदत होणार असल्याची माहिती सभापती गणेश भिमराव पाटील यांनी दिली.
यंदाच्या रब्बी हंगामात मका, ज्वारी, हरभरा व गहू या पिकांची आवक पाचोरा-भडगाव कार्यक्षेत्रासह परिसरातून मोठ्या प्रमाणात होत आहे. वाढत्या आवकेच्या पार्श्वभूमीवर उपबाजार भडगाव येथे व्यापाऱ्यांसोबत बैठक घेण्यात आली. या बैठकीत शेतमालाच्या विक्री प्रक्रियेत येणाऱ्या अडचणी, लिलाव व्यवस्थापन, सुविधा व शेतकऱ्यांच्या हिताच्या मुद्द्यांवर सविस्तर चर्चा करण्यात आली.
चर्चेनंतर शेतमालाची विक्री पारदर्शक व स्पर्धात्मक पद्धतीने व्हावी यासाठी जाहीर लिलाव पद्धतीने व्यवहार करण्याचा एकमताने निर्णय घेण्यात आला. त्यानुसार आजपासून उपबाजारात जाहीर लिलाव प्रक्रियेला सुरुवात करण्यात आली.
बाजार समितीच्या वतीने लिलाव प्रक्रिया अधिक गतिमान करण्यावर भर देण्यात येणार असून, शेतकऱ्यांना त्यांच्या मालाला योग्य व जास्तीत जास्त बाजारभाव मिळावा यासाठी आवश्यक सुविधा उपलब्ध करून देण्यात येणार आहेत. यामध्ये अचूक वजनमाप, तात्काळ देयक (पेमेंट) व पारदर्शक व्यवहार प्रणाली यांचा समावेश आहे. या सुविधांमुळे भडगाव उपबाजारात शेतमालाची आवक दिवसेंदिवस वाढत असल्याचेही सांगण्यात आले.
दरम्यान, शेतकऱ्यांनी आपला शेतमाल विक्रीसाठी बाजार समितीच्या आवारातच आणावा व खाजगी ठिकाणी विक्री टाळावी, असे आवाहन बाजार समितीच्या पदाधिकाऱ्यांनी केले आहे. खाजगी व्यवहारांमुळे फसवणुकीची शक्यता नाकारता येत नाही, त्यामुळे अधिकृत लिलाव प्रक्रियेलाच प्राधान्य द्यावे, असेही त्यांनी नमूद केले.
या प्रसंगी उपसभापती प्रकाश अमृत पाटील, संचालक लखीचंद प्रकाश पाटील, सचिव बी.बी. बोरुडे, उपसचिव प्रतिक रमेश ब्राम्हणे, तसेच उपबाजार प्रमुख बलवीरसिंग प्रतापसिंग शिख यांच्यासह व्यापारी बांधव मोठ्या संख्येने उपस्थित होते.
