भडगावमध्ये पोलिसांची धडक मोहीम,अवैध दारू, जुगार अड्ड्यांवर कारवाई ३१ वॉरंट बजावणी २३ वाहतूक कारवाया
भडगाव प्रतिनिधी :-
जळगाव जिल्ह्यात कायदा व सुव्यवस्था अबाधित राखण्यासाठी मा. पोलीस अधीक्षक यांच्या आदेशान्वये राबविण्यात आलेल्या विशेष मोहिमेअंतर्गत भडगाव पोलीस स्टेशन हद्दीत मोठ्या प्रमाणात धडक कारवाई करण्यात आली. सकाळी १०.०० ते रात्री ११.०० वाजेपर्यंत सुरू असलेल्या या मोहिमेत शहरी तसेच ग्रामीण भागात एकाच वेळी विविध ठिकाणी छापे टाकून अवैध धंदे व गुन्हेगारीवर कठोर कारवाई करण्यात आली.
या मोहिमेसाठी पोलीस अधिकारी व अंमलदारांची विशेष पथके तयार करण्यात आली होती. या पथकांनी अवैध हातभट्टी दारू तयार करणारे व विक्री करणारे, जुगार खेळणारे, वाहतूक नियमांचे उल्लंघन करणारे तसेच संशयास्पद हालचाली करणाऱ्या व्यक्तींवर लक्ष केंद्रीत करून कारवाई केली.
कारवाईचा तपशील पुढीलप्रमाणे :
अवैध दारू/हातभट्टी : ०६ प्रकरणे नोंद; ग्रामीण व शहरी भागात कारवाई
जुगार अड्ड्यांवर छापे : ०४ प्रकरणे
वाहतूक नियमभंग (मोटार वाहन कायदा) : २३ कारवाया; ₹१४,०००/- दंड वसूल
(ट्रिपल सीट, फॅन्सी नंबर प्लेट, नो-पार्किंग उल्लंघन)
एम.व्ही. अॅक्ट कलम २८५ : ०२ प्रकरणे; सार्वजनिक ठिकाणी वाहतुकीस अडथळा
ड्रंक अँड ड्राईव्ह : ०२ चालकांवर कारवाई
कोप्ता अंतर्गत कारवाई : १० प्रकरणे; ₹२,०००/- दंड
(सार्वजनिक ठिकाणी धूम्रपान करणाऱ्यांवर)
बी.पी. अॅक्ट कलम १२२ : ०२ संशयितांवर कारवाई
बी.पी. अॅक्ट कलम ११२/११७ : ०२ प्रकरणे; शांतता भंग करणाऱ्यांवर कारवाई
NDPS अंतर्गत : ०१ प्रकरण; गांजा सेवन करणाऱ्यावर गुन्हा
हरवलेले (Missing) : ०३ व्यक्तींचा शोध लावण्यात यश
BW/NBW वॉरंट बजावणी : ३१ प्रकरणांमध्ये आरोपी/साक्षीदार शोधून कारवाई
लॉज तपासणी : ०२ ठिकाणी तपासणी
रेकॉर्डवरील गुन्हेगार तपासणी : ०३ जणांची पडताळणी
या मोहिमेदरम्यान पोलिसांनी विविध ठिकाणी अचानक छापे टाकून अवैध धंदे करणाऱ्यांमध्ये मोठी धास्ती निर्माण केली. विशेषतः हातभट्टी दारू व जुगार अड्ड्यांवर करण्यात आलेल्या कारवाईमुळे परिसरातील बेकायदेशीर गतिविधींना मोठा आळा बसण्याची शक्यता व्यक्त केली जात आहे.
वाहतूक नियमांचे उल्लंघन करणाऱ्यांवरही कठोर कारवाई करत पोलिसांनी नागरिकांना नियमांचे पालन करण्याचा इशारा दिला. तसेच सार्वजनिक ठिकाणी धूम्रपान, मद्यपान करून वाहन चालविणे व शांतता भंग करणाऱ्या व्यक्तींवरही कारवाई करून कायदा सुव्यवस्थेचा संदेश दिला.
ही संपूर्ण कारवाई मा. पोलीस अधीक्षक श्री. श्रीकांत धिवरे, मा. अपर पोलीस अधीक्षक कविता नेरकर व मा. उपविभागीय पोलीस अधिकारी विजयकुमार ठाकुरवाड यांच्या मार्गदर्शनाखाली पार पडली.
भडगाव पोलीस स्टेशनचे प्रभारी अधिकारी श्री. प्रदीप एकशिंगे यांच्या नेतृत्वाखाली पोलीस अधिकारी व अंमलदारांच्या पथकाने ही उल्लेखनीय कामगिरी यशस्वीरीत्या पार पाडली.
पोलीस प्रशासनाकडून अशा प्रकारच्या विशेष मोहिमा पुढेही सुरू राहणार असल्याचे संकेत देण्यात आले असून नागरिकांनी कायद्याचे पालन करून सहकार्य करावे, असे आवाहन करण्यात आले आहे.
