पाचोरा तालुक्यात विवाहित महिलेला धमकावून लैंगिक अत्याचार; आरोपीविरुद्ध गुन्हा नोंद

पाचोरा तालुक्यात विवाहित महिलेला धमकावून लैंगिक अत्याचार; आरोपीविरुद्ध गुन्हा नोंद

पाचोरा प्रतिनिधी :-

पाचोरा तालुक्यातील एका २३ वर्षीय विवाहित महिलेला धमकी देत तिच्यावर दोन वेळा लैंगिक अत्याचार करण्यात आल्याचा प्रकार समोर आला आहे. या प्रकरणी पाचोरा पोलीस ठाण्यात संशयित व्यक्तीविरुद्ध गंभीर स्वरूपाचा गुन्हा दाखल करण्यात आला असून पोलिसांकडून पुढील तपास सुरू आहे.

पोलिसांनी दिलेल्या माहितीनुसार, कु-हाड तांडा परिसरातील रहिवासी असलेल्या एका व्यक्तीने पीडित महिलेला तिच्या अल्पवयीन मुलीच्या सुरक्षिततेबाबत भीती दाखवून मानसिक दबावाखाली ठेवले. या दबावाखाली दिनांक १९ नोव्हेंबर २०२५ रोजी दुपारी सुमारे १ वाजता संबंधित व्यक्तीने महिलेला पाचोरा शहरातील एका हॉटेलमध्ये नेऊन तिच्या इच्छेविरुद्ध शारीरिक संबंध ठेवले, असा आरोप तक्रारीत नमूद आहे.

यानंतरही संबंधित व्यक्तीने महिलेला सातत्याने धमकावत समाजात बदनामी करण्याची तसेच मुलीच्या जीवाला धोका पोहोचवण्याची भीती दाखवली. या कारणामुळे दिनांक २० जानेवारी २०२६ रोजी पीडितेला अहिल्यानगर जिल्ह्यातील मिरजगाव परिसरातील एका हॉटेलमध्ये नेण्यात आले, तेथे पुन्हा तिच्यावर लैंगिक अत्याचार केल्याचा आरोप करण्यात आला आहे.

घटनेनंतर पीडित महिलेने धैर्य दाखवत पाचोरा पोलीस ठाण्यात तक्रार दाखल केली. तिच्या तक्रारीच्या आधारे गुन्हा क्रमांक ४४/२०२६ अन्वये संबंधित आरोपीविरुद्ध भारतीय न्याय संहिता कलम ६४, ६४(२)(m), ११५(२), ३५१(२)(३) अंतर्गत गुन्हा नोंदवण्यात आला आहे.

या प्रकरणाचा तपास पाचोरा पोलीस करत असून पुढील कायदेशीर कारवाई सुरू असल्याचे पोलिसांनी सांगितले.