ठाकरे विरुद्ध ठाकरे’ समीकरणात नवा अध्याय? उद्धव ठाकरेंच्या सूचक वक्तव्याने मनसे-शिवसेना (ठाकरे गट) युतीची चर्चांना नवसंजीवनी.!!!

By Abrar Mirza On Jun 8, 2025

मुंबई:-

महाराष्ट्राच्या राजकारणात पुन्हा एकदा ‘ठाकरे विरुद्ध ठाकरे’ या समीकरणाला नवी दिशा मिळण्याची चिन्हं स्पष्टपणे दिसत आहेत. आगामी महापालिका निवडणुकांच्या पार्श्वभूमीवर मनसे आणि शिवसेना (ठाकरे गट) यांच्यातील संभाव्य युतीबाबत चर्चांना उधाण आले आहे. शिवसेना (ठाकरे गट) प्रमुख आणि माजी मुख्यमंत्री उद्धव ठाकरे यांनी या संदर्भात मौन सोडत एक मोठं आणि सूचक वक्तव्य केलं आहे, ज्यामुळे युतीच्या शक्यतांना बती मिळाली आहे.

उद्धव ठाकरे म्हणाले, “महाराष्ट्राच्या जनतेच्या मनात जे आहे, तेच होईल. आता संदेश पाठवण्याचा वेळ नाही, थेट बातमीच देणार!” त्यांच्या या वक्तव्यामुळे मनसेप्रमुख राज ठाकरे आणि उद्धव ठाकरे यांच्यातील युतीच्या चर्चांना नवसंजीवनी मिळाली आहे. विशेष म्हणजे, उद्धव ठाकरेंच्या या वक्तव्यानंतर लगेचच मनसेकडूनही हालचाली सुरू झाल्या आहेत.

मनसेकडूनही युतीचे प्रयत्न आणि सकारात्मक प्रतिसाद :

आज राज ठाकरे यांनी मुंबईतील शिवतीर्थ येथे आपल्या पक्षाच्या उपाध्यक्षांची महत्त्वाची बैठक बोलावली होती, ज्याकडे सर्वांचे लक्ष लागले होते. शिवसेना-मनसे युतीची शक्यता पाहता ही बैठक अधिकच महत्त्वपूर्ण मानली जात आहे.

मनसेचे नेते संदीप देशपांडे यांनी यापूर्वीच उद्धव ठाकरेंना “राज ठाकरेंना एक फोन करावा” असे आवाहन केले होते आणि त्यानंतर काही तासांतच उद्धव ठाकरेंकडून युतीवर थेट भाष्य आल्याचे विशेष लक्षवेधी आहे.

मनसेचे आणखी एक नेते अविनाश जाधव यांनीही सकारात्मक प्रतिसाद देत म्हटले आहे की, “आपण एक पाऊल पुढे आलात, तर राज ठाकरे शंभर पावले पुढे येतील, याची आम्हाला खात्री आहे.” त्यांनी स्पष्ट केले की, युती ही एका दिवसात होत नाही, त्यासाठी प्रक्रिया असते, परंतु राज्यातील कार्यकर्ते, मराठी मतदार आणि सामान्य नागरिकांच्या मनात जे आहे, तेच घडावे अशी त्यांची इच्छा आहे. अविनाश जाधव यांनी राज ठाकरेंनी नेहमीच महाराष्ट्राच्या हितासाठी काम केले असल्याचे नमूद करत पुढचे पाऊल उद्धव ठाकरेंकडून अपेक्षित असल्याचे म्हटले आहे.

अमित ठाकरेंचा सूचक संदेश आणि राजकीय परिणाम:

दरम्यान, अमित ठाकरे यांनी काही दिवसांपूर्वीच “दोन्ही भावांकडे एकमेकांचे नंबर आहेत” असे सूचक विधान केले होते, ज्याचे अविनाश जाधव यांनीही समर्थन केले आहे. मराठी माणसाच्या हितासाठी एक फोन येणे ही फक्त वेळेची गरज असल्याचेही ते म्हणाले.

या सगळ्या घडामोडी पाहता शिवसेना (ठाकरे गट) आणि मनसे या दोन मराठी भावनांचा आधार असलेल्या पक्षांमध्ये युती होण्याची शक्यता प्रबळ झाली आहे. दोन्ही ठाकरे बंधूंमधील वैयक्तिक संबंध, राजकीय समांतरता आणि मराठी मतदारांचा दबाव यामुळे येत्या काळात एकत्र येण्याची शक्यता नाकारता येत नाही.

राजकीय निरीक्षकांच्या मते, जर ही युती झाली तर ती महाराष्ट्राच्या राजकारणात, विशेषतः मुंबई, ठाणे, नाशिक, पुणे यांसारख्या शहरी भागात मराठी मतांची घनता लक्षात घेता भाजप आणि महायुतीसाठी डोकेदुखी ठरू शकते. ही युती केवळ एक राजकीय गणित नसून, भावना आणि नेतृत्वाचा संगम असेल, ज्यामुळे अनेक वर्षांपासून दुरावलेली एक घराणेशाही पुन्हा एकत्र येईल. आगामी महापालिका निवडणुकांच्या पार्श्वभूमीवर आणि मराठी अस्मितेच्या दृष्टीनेही ही एक ऐतिहासिक घडामोड ठरू शकते.