तलवार फिरवत दहशत माजवणारा इसम जेरबंद
भडगाव पोलिसांची धाडसी कारवाई; धारदार तलवार जप्त
भडगाव, दि. २ मे — शहर व परिसरात तलवार फिरवत नागरिकांमध्ये दहशत निर्माण करणाऱ्या एका इसमाला भडगाव पोलिसांनी धाडसी कारवाई करत अटक केली असून त्याच्याकडून धारदार तलवार जप्त करण्यात आली आहे. या कारवाईमुळे परिसरातील नागरिकांनी सुटकेचा श्वास सोडला आहे.
पोलिसांनी दिलेल्या माहितीनुसार, दि. २ मे रोजी पोलिस उपनिरीक्षक सुशील सोनवणे यांना गुप्त माहिती मिळाली की, वडजी (ता. भडगाव) येथे एक इसम उघडपणे तलवार घेऊन फिरत असून दहशत निर्माण करत आहे. माहिती मिळताच पोलिस पथकाने तात्काळ घटनास्थळी धाव घेतली.
पोलिसांची चाहूल लागताच संबंधित इसमाने पळून जाण्याचा प्रयत्न केला; मात्र पोलिसांनी पाठलाग करून त्याला ताब्यात घेतले. तपासादरम्यान आरोपीकडून सुमारे २ फूट ७ इंच लांबीची लोखंडी तलवार जप्त करण्यात आली. जप्त तलवार धारदार असून तिचा वापर करून नागरिकांमध्ये भीतीचे वातावरण निर्माण केले जात असल्याचे प्राथमिक चौकशीत समोर आले.
अटक करण्यात आलेल्या आरोपीचे नाव शरद उत्तम गायकवाड (वय २९, रा. वडजी, ता. भडगाव) असे आहे. त्याच्याविरुद्ध भडगाव पोलिस ठाण्यात गुन्हा क्रमांक १४८/२०२६ नोंद करण्यात आला असून भारतीय दंड संहिता कलम १८८, ५०४, ५०६ तसेच शस्त्र अधिनियम ४/२५ अन्वये गुन्हा दाखल करण्यात आला आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक कविता नेरकर व उपविभागीय पोलीस अधिकारी विजयकुमार ठाकुरवाड यांच्या मार्गदर्शनाखाली पार पडली. पोलीस निरीक्षक प्रदीप एकशिंगे यांच्या नेतृत्वाखाली पोलिस उपनिरीक्षक सुशील सोनवणे यांच्यासह गोवर्धन बोरसे, निलेश ब्राम्हणकर, भूषण पाटील, प्रवीण परदेशी, सुनील राजपूत, हंसराज देशमुख व संदीप सोनावणे यांनी कारवाईत सक्रिय सहभाग घेतला.
दरम्यान, पोलिसांनी नागरिकांना आवाहन केले आहे की, परिसरात कोणत्याही प्रकारच्या संशयास्पद हालचाली आढळल्यास तात्काळ पोलिसांना माहिती द्यावी, जेणेकरून कायदा व सुव्यवस्था अबाधित राखता येईल.
