अमृतसर (पंजाब): थाई बॉक्सिंग फेडरेशन ऑफ इंडियाच्या वतीने आयोजित १६वी राष्ट्रीय (ऑल इंडिया) थाई बॉक्सिंग स्पर्धा अमृतसर येथे दिनांक ७ ते ९ नोव्हेंबर २०२५ दरम्यान भव्यदिव्य पद्धतीने पार पडली. देशातील १६ राज्यांतील शेकडो स्पर्धकांनी सहभाग घेतल्याने या स्पर्धेला मोठी प्रतिष्ठा प्राप्त झाली होती. महाराष्ट्र, ओडिशा, आसाम, गुजरात, पंजाब, जम्मू–काश्मीर, मध्य प्रदेश, राजस्थान, चंदीगड, केरळ अशा विविध राज्यांतून उत्तम दर्जाचे खेळाडू मैदानात उतरले होते.
या तीव्र आणि रोमांचक स्पर्धेमध्ये जळगाव जिल्ह्यातील भडगाव व चाळीसगाव तालुक्याच्या खेळाडूंनी उल्लेखनीय कामगिरी करून राष्ट्रीय पातळीवर आपला ठसा उमटवला. भडगाव शहरातील दमदार व कौशल्यपूर्ण खेळासाठी ओळखले जाणारे सतीश दाभाडे यांनी सुवर्णपदक पटकावून राज्याचे नाव अभिमानाने उज्ज्वल केले. निर्णायक फेरीत त्यांनी प्रतिस्पर्ध्यांवर प्रभावी आघात करत आपली पकड मजबूत ठेवत सुवर्णपदकाची जोरदार कमाई केली.
सतीश दाभाडे यांच्या या यशामागे थाई बॉक्सिंग महाराष्ट्रचे सहसचिव आणि अनुभवी प्रशिक्षक अबरार खान यांचे कठोर परिश्रम, तांत्रिक मार्गदर्शन आणि सातत्यपूर्ण प्रशिक्षण महत्वाचे ठरले. त्यांच्या मार्गदर्शनाखाली जिल्ह्यातील अनेक खेळाडू राष्ट्रीय पातळीवर उल्लेखनीय कामगिरी करत असल्याचे गौरवोद्गार खेल जाणकारांनी काढले आहेत.
स्पर्धेच्या आयोजनादरम्यान विविध वजनगटांमध्ये जोरदार सामने रंगले. देशभरातील दर्जेदार खेळाडूंनी एकापेक्षा एक सरस तंत्र, बचावकौशल्य आणि आक्रमणशैली सादर केली. त्यातही भडगाव तालुक्यातील खेळाडूने सुवर्णपदक मिळवणे हा जिल्ह्यासाठी अभिमानाचा क्षण ठरला.
स्थानिक क्रीडाविश्वात या यशाचा मोठा उत्साह असून सतीश दाभाडे यांचे अभिनंदन करण्यासाठी शुभेच्छांचा वर्षाव होत आहे. भविष्यात भडगाव–चाळीसगाव परिसरातील आणखी खेळाडू राष्ट्रीय आणि आंतरराष्ट्रीय पातळीवर चमकतील, अशी अपेक्षा क्रीडा प्रेमींनी व्यक्त केली आहे.
या राष्ट्रीय स्पर्धेने पुन्हा एकदा सिद्ध केले की ग्रामीण भागातील खेळाडूही योग्य प्रशिक्षण, दृढ संकल्प आणि मेहनत यांच्या जोरावर राष्ट्रीय स्तरावर चमकण्याची क्षमता ठेवतात.