नागरी प्रश्नांकडे लक्ष वेधत अपक्ष उमेदवार म्हणून प्रचाराला सुरुवात
भडगाव प्रतिनिधी : –
भडगाव नगरपरिषदेच्या सार्वत्रिक निवडणुकीत ए–सी आरक्षित प्रभाग क्रमांक ११ मधील राजकीय वातावरण चुरशीचे बनले असून अविनाश पुंडलिक अहिरे यांनी अपक्ष उमेदवार म्हणून दाखल केलेल्या उमेदवारीने निवडणुकीला नवी चालना मिळाली आहे. समर्थकांच्या घोषणांनी आणि उत्साहपूर्ण मिरवणुकीने शहरातील राजकीय हालचालींमध्ये मोठी रंगत आणली.
अविनाश अहिरे यांनी प्रचारयात्रेला प्रारंभ करण्यापूर्वी हनुमान मंदिरात विधिवत पूजन केले. त्यानंतर तरुण कार्यकर्ते, महिला, ज्येष्ठ नागरिक आणि विविध समाजघटकांच्या उपस्थितीत त्यांनी मिरवणुकीत घोषणांचा गजर, ढोल-ताशे आणि समर्थकांची लक्षणीय गर्दी दिसून आली.
“जनतेचा विश्वास हेच माझे बळ” — अविनाश अहिरे
अविनाश अहिरे म्हणाले,
“प्रभागातील सर्वसामान्य नागरिकांचा विश्वास हेच माझे खरे बळ आहे. अनेक वर्षांपासून प्रलंबित असलेल्या मूलभूत नागरी सुविधांच्या प्रश्नांवर आता ठोस तोडगा काढण्याची वेळ आली आहे.प्रभागाचा विकास करण्याची जबाबदारी मी स्वतःस्वीकारली आहे.”
त्यांनी विशेषतः पाणीपुरवठा, स्वच्छता, रस्ते आणि सरकारी योजनांच्या अंमलबजावणीतील त्रुटींवर नाराजी व्यक्त केली
प्रभागातील प्रमुख समस्या आणि अविनाश अहिरे यांचा विकास आराखडा
प्रभागातील पाणीपुरवठा अनियमित असून अनेक वस्त्यांमध्ये पाण्याचा तुटवडा कायम असल्याचे त्यांनी नमूद केले. नवीन पाईपलाइन, दाब व्यवस्थापन व देखभाल यावर भर देत ही समस्या कायमस्वरूपी सोडवण्याचा त्यांचा मानस आहे.
स्वच्छता आणि गटारव्यवस्था :
नाल्यांची अडचण, गटार ओसंडणे आणि स्वच्छता व्यवस्थेतील त्रुटींमुळे नागरिकांना दरवर्षी मनस्ताप सहन करावा लागतो. आधुनिक स्वच्छता उपकरणे व नियमित सफाई मोहीम राबवण्याचा प्रस्ताव त्यांनी मांडला.
अंतर्गत रस्ते :
खड्डेमय, जीर्ण रस्त्यांची समस्या गंभीर असून टप्प्याटप्प्याने काँक्रीट व डांबरी रस्त्यांची उभारणी करण्याचा निर्धार त्यांनी व्यक्त केला.
सरकारी योजना सर्वांसाठी :
महिला, युवक आणि वंचित घटकांच्या सक्षमीकरणासाठी कौशल्य विकास, कर्जसहाय्य व सामाजिक प्रबोधन मोहिमा राबवण्याचे आश्वासन त्यांनी दिले.
“मी पक्षाचा नव्हे, जनतेचाच उमेदवार”
अहिरे यांनी अपक्ष म्हणून निवडणूक लढवण्यामागील भूमिका स्पष्ट केली.
“मी कोणत्याही पक्षाचा नाही.माझा पक्ष म्हणजे माझे प्रभागातील लोक. त्यांचे म्हणणे आणि त्यांचा आदेश हेच मला मान्य आहे,” असे ते म्हणाले.
त्यांच्या या विधानाने प्रभागातील राजकीय चर्चेला उधाण आले असून स्थानिक पातळीवर विविध अंदाज बांधले जाऊ लागले आहेत.
निवडणुकीची चुरस वाढली; प्रभागात उत्साहाचे वातावरण
अविनाश अहिरे यांच्या प्रवेशामुळे प्रभाग क्रमांक ११ मध्ये निवडणूक अधिकच रंगतदार झाली आहे. समर्थकांची हालचाल, मिरवणुकीतील घोषणाबाजी आणि सोशल मीडियावरील चर्चांमुळे प्रभागात उत्साहाचे वातावरण निर्माण झाले आहे.
राजकीय जाणकारांच्या मते, या निवडणुकीत विकासाचे मुद्दे अग्रभागी राहण्याची शक्यता असून अविनाश अहिरे यांच्या अपक्ष उमेदवारीमुळे प्रभागातील मतदारांमध्ये नव्या समीकरणांची चर्चा रंगत आहे.