रांगोळीच्या माध्यमातून जुनी पेन्शन आंदोलनाची जनजागृती.!!!

रांगोळीच्या माध्यमातून जुनी पेन्शन आंदोलनाची जनजागृती.!!!

भडगाव प्रतिनिधी :-

सन 2005 नंतर शासकीय सेवेत रुजू झालेल्या कर्मचाऱ्यांना शासनाने जुनी पेन्शन योजना (OPS) रद्द करून नवीन अंशदायी पेन्शन योजना (NPS) लागू केली आहे. या निर्णयानंतर कर्मचाऱ्यांना निवृत्तीनंतर स्थैर्य देणारी जुनी पेन्शन योजना नाकारण्यात आली असून, त्याबाबत गेल्या दहा वर्षांपासून देशभरात मोठ्या प्रमाणावर आंदोलन सुरू आहे. महाराष्ट्रासह सर्व राज्यांतील शासकीय कर्मचारी सातत्याने शासनाचे लक्ष वेधण्याचा प्रयत्न करत आहेत. मात्र, अद्याप शासनाने या न्याय्य व संविधानिक मागणीकडे सकारात्मक पाऊल उचललेले नाही.

या पार्श्वभूमीवर नॅशनल मूव्हमेंट फॉर ओल्ड पेन्शन स्कीम (NMOPS) या राष्ट्रीय संघटनेचे राष्ट्रीय अध्यक्ष विजयकुमार बंधू यांनी 25 नोव्हेंबर 2025 रोजी दिल्ली येथे “पेन्शन मोर्चा” काढण्याचे आयोजन केले आहे. या मोर्चात संपूर्ण भारतभरातील लाखो कर्मचारी सहभागी होणार असून, जुनी पेन्शन योजना लागू करण्याचा सरकारवर दबाव आणण्याचा हेतू आहे.

या आंदोलनाची जनजागृती व्हावी, कर्मचाऱ्यांमध्ये उत्साह निर्माण व्हावा व सर्वसामान्य नागरिकांनाही या विषयाचे महत्त्व कळावे, यासाठी महाराष्ट्र राज्य जुनी पेन्शन संघटनेचे आरोग्य विभाग प्रमुख संजय सोनार कळवाडीकर उर्फ “सोनार मामा” यांनी दीपावलीच्या निमित्ताने रांगोळीच्या माध्यमातून वेगळ्या पद्धतीने जनजागृती केली आहे.

भडगाव येथे आपल्या घरासमोर त्यांनी “जुनी पेन्शन योजना मिळालीच पाहिजे” या संदेशाची रंगीत रांगोळी साकारली. या उपक्रमासाठी आदर्श शिक्षक योगेश शिंपी आणि योगिता सोनार यांनी सहकार्य केले. दीपावलीचा सण साजरा करताना समाजहिताचा संदेश देण्याचे कार्य सोनार दरवर्षी करतात. आरोग्य विभागात कार्यरत असलेले सोनार विविध सामाजिक विषयांवर रांगोळीच्या माध्यमातून जनजागृती करीत असतात.

2017 पासून जुनी पेन्शन लढ्याचा प्रचारक म्हणून सोनार सातत्याने कार्यरत आहेत. त्यांनी आपल्या घरावर “तुळशीपत्र ठेवून” या लढ्याला आरंभ केला आणि तेव्हापासून अखंड संघर्ष सुरू ठेवला आहे. त्यांच्या या सातत्यपूर्ण कार्यामुळे त्यांची ओळख “पेन्शन मामा” म्हणून राज्यभर प्रसिद्ध झाली आहे.

सोनार यांनी दोन वर्षांपूर्वी राज्यातील 20 जिल्ह्यांतून दुचाकीवरून “पेन्शन संघर्ष यात्रा” काढून कर्मचाऱ्यांपर्यंत या आंदोलनाचा संदेश पोहोचवला होता. त्यांचा हा उपक्रम राज्यात आणि देशभरातील कर्मचाऱ्यांसाठी प्रेरणादायी ठरला आहे.

या संदर्भात बोलताना सोनार मामा म्हणाले,

> “मी माझ्या घरासमोर रांगोळीच्या माध्यमातून जुनी पेन्शन आंदोलनाची जनजागृती केली आहे. ही फक्त एक रांगोळी नसून, कर्मचाऱ्यांच्या हक्कासाठीचा दृढ निश्चय आहे. मी सर्व शासकीय कर्मचाऱ्यांना आवाहन करतो की 25 नोव्हेंबर 2025 रोजी दिल्ली येथे होणाऱ्या पेन्शन मोर्चात मोठ्या संख्येने सहभागी व्हा आणि आपल्या हक्काच्या पेन्शनसाठी आवाज उठा.”सोनार यांचा हा अनोखा उपक्रम समाजात चर्चेचा विषय ठरत असून, कर्मचाऱ्यांमध्ये नवचैतन्य निर्माण करणारा ठरला आहे.