अंधाऱ्या ठिकाणी नेऊन 6 वर्षांच्या चिमुरडीवर अत्याचार
बदलापूर पुन्हा हादरलं.!!!
अल्पवयीन मुलीवरच्या अत्याचाराने बदलापूर पुन्हा एकदा हादरलं आहे. बदलापूरमध्ये 6 वर्षांच्या मुलीसोबत गैरकृत्य करण्यात आलं आहे. बदलापूर पश्चिम पोलीस स्टेशनच्या हद्दीत हा धक्कादायक प्रकार घडला आहे.
याच परिसरात राहणाऱ्या एका 16 वर्षांच्या मुलाने अल्पवयीन मुलीसोबत गैरकृत्य केलं आहे.
6 वर्षांच्या अल्पवयीन मुलीला खेळायच्या बहाण्याने मुलाने अंधार असलेल्या ठिकाणी नेलं आणि तिच्यासोबत गैरकृत्य केलं. मुलगी शाळेच्या वेळेत शाळेत जायचं नाही, असं घाबरून आईला सांगत होती, मात्र मुलगी असं का करत आहे? असा संशय आईला आला. अखेर आईने विश्वासात घेऊन मुलीला विचारलं, तेव्हा तिने घडलेला प्रकार सांगितला.
मुलीने झालेला सगळा प्रकार सांगितल्यानंतर पालकांनी थेट बदलापूर पोलीस स्टेशन गाठलं आणि तक्रार दिली. यानंतर बदलापूर पोलिसांनी संवेदनशील घटनेचं गांभीर्य ओळखून तात्काळ पोक्सो कायद्याअंतर्गत गुन्हा दाखल केला. यानंतर अल्पवयीन आरोपीला ताब्यात घेऊन त्याला भिवंडीच्या बाल न्यायालयात हजर करण्यात आलं. या घटनेनंतर बदलापूरमध्ये खळबळ माजली आहे.
बदलापूर पुन्हा हादरलं….
याआधी बदलापूरच्या शाळेमध्ये अल्पवयीन मुलींवर सफाई कर्मचारी असलेल्या अक्षय शिंदेने अत्याचार केले होते, या घटनेनंतर महाराष्ट्रात संतापाचं वातावरण होतं. या अत्याचाराविरोधात बदलापूरकर रस्त्यावर उतरले आणि त्यांनी दिवसभर रेल रोको आंदोलन केलं. पोलिसांच्या जीपमधून जात असतानाच अक्षय शिंदेने पोलिसांकडे असलेली बंदूक खेचून घेतली आणि गोळीबाराला सुरूवात केली, यामध्ये अक्षय शिंदेचं एन्काऊंटर करण्यात आलं होतं.
