उत्साहात साजरी आंबेडकर जयंती; मिरवणुकीत नागरिकांचा सहभाग
कासोदा प्रतिनिधी :– शैलेश पांडे
महामानव डॉ. बाबासाहेब आंबेडकर यांची १३५ वी जयंती कासोदा येथे उत्साहात साजरी करण्यात आली. यानिमित्त डॉ. बाबासाहेब आंबेडकर जयंती समितीच्या वतीने विविध कार्यक्रमांचे आयोजन करण्यात आले.
कार्यक्रमाची सुरुवात गौतम बुद्ध व डॉ. बाबासाहेब आंबेडकर यांच्या प्रतिमेला पुष्पहार अर्पण करून करण्यात आली. कार्यक्रमाच्या अध्यक्षस्थानी कासोदा नगरीचे प्रथम नागरिक बंटी उर्फ पुरुषोत्तम चौधरी होते.
यावेळी समितीचे अध्यक्ष मिलिंद मोरे यांच्या हस्ते मान्यवरांचा सत्कार करण्यात आला. यामध्ये माजी सरपंच महेश बापू पांडे, उमेश भाऊ पाटील, सपोनि श्रीकांत पाटील व त्यांचे कर्मचारी, सुदाम तात्या राक्षे, रवी चौधरी तसेच पत्रकार व ग्रामस्थ उपस्थित होते.
कार्यक्रमात सपोनि श्रीकांत पाटील, महेश बापू पांडे, उमेश भाऊ पाटील, साहेबराव पानपाटील व सीआरपीएफ जवान स्वप्नील बाविस्कर यांनी मनोगत व्यक्त केले. यावेळी ८ वर्षीय रिया पानपाटील हिने केलेल्या भाषणाने उपस्थितांचे लक्ष वेधले.
संध्याकाळी डीजेच्या गजरात मिरवणूक काढण्यात आली. ही मिरवणूक शांततेत व उत्साहात पार पडली. कार्यक्रम यशस्वी करण्यासाठी जयंती समितीच्या सदस्यांनी परिश्रम घेतले.
