वाढदिवसाचा अनोखा आदर्श! सफाई कर्मचाऱ्यांच्या हस्ते केक, पावसाळ्यात रेनकोटची भेट
शिवसेना-युवासेना व स्व. बापूजी युवा फाउंडेशनचा सेवाभावी उपक्रम; कु. लक्षिता लखीचंद पाटील हिचा वाढदिवस समाजसेवेत साजरा
भडगाव प्रतिनिधी :-
आजच्या काळात वाढदिवस मोठ्या थाटामाटात साजरे करण्याची स्पर्धा असताना, समाजासाठी अहोरात्र कष्ट करणाऱ्या सफाई कर्मचाऱ्यांप्रती कृतज्ञता व्यक्त करत वाढदिवस साजरा करण्याचा एक प्रेरणादायी आदर्श शिवसेना-युवासेना व स्व. बापूजी युवा फाउंडेशन यांनी घालून दिला. कु. लक्षिता लखीचंद पाटील हिच्या वाढदिवसानिमित्त नगरपालिका सफाई कर्मचाऱ्यांना मोफत रेनकोटचे वाटप करण्यात आले.
शहर स्वच्छ आणि सुंदर ठेवण्यासाठी कोणत्याही ऋतूची पर्वा न करता दिवसरात्र काम करणाऱ्या सफाई कर्मचाऱ्यांचा सन्मान करण्याच्या उद्देशाने हा उपक्रम राबविण्यात आला. विशेष म्हणजे, यावेळी सफाई कर्मचाऱ्यांच्या शुभहस्ते वाढदिवसाचा केक कापण्यात आला. वाढदिवसाच्या या आगळ्यावेगळ्या उत्सवामुळे उपस्थितांच्या चेहऱ्यावर समाधान आणि आनंद झळकत होता.
पावसाळ्याच्या पार्श्वभूमीवर सफाई कर्मचाऱ्यांना रेनकोट भेट देत त्यांच्या आरोग्याची आणि सुरक्षिततेची काळजी घेण्याचा संदेशही या उपक्रमातून देण्यात आला. समाजासाठी निस्वार्थपणे कार्य करणाऱ्यांचा सन्मान हीच खरी समाजसेवा असून, “स्वतःचा आनंद समाजाच्या सेवेत वाटला, तरच वाढदिवस खऱ्या अर्थाने संस्मरणीय ठरतो,” हा विचार प्रत्यक्ष कृतीतून अधोरेखित करण्यात आला.
या प्रसंगी गटनेते लखीचंद पाटील, नगरसेवक संतोष महाजन, जग्गू भोई, अतुल पाटील, जहांगीर मालचे, देवाजी आहिरे, विजयकुमार भोसले, राहुल ठाकरे, महेंद्र ततार, वाल्मिक पवार, पिंटू मराठे, भोला पाटील तसेच फाउंडेशनचे पदाधिकारी, संचालक, सदस्य आणि मान्यवर मोठ्या संख्येने उपस्थित होते.
समाजसेवा, सामाजिक बांधिलकी आणि कर्तव्यनिष्ठ कर्मचाऱ्यांप्रती कृतज्ञता या तिन्ही मूल्यांचा सुंदर संगम या उपक्रमातून पाहायला मिळाला. त्यामुळे हा वाढदिवस केवळ एका व्यक्तीचा उत्सव न ठरता समाजासाठी प्रेरणा देणारा संदेश ठरला. या अनोख्या उपक्रमाचे नागरिकांसह सर्व स्तरातून कौतुक होत आहे.
