गर्भवती महिलेला धावत्या ट्रेनमधून फेकून दिलं
कारण धक्कादायक, आरोपी म्हणतो ‘ती बलात्कार…
तामिळनाडूमधील कोईम्बतूर जिल्ह्यात गर्भवती महिलेला धावत्या ट्रेनमधून खाली ढकलण्यात आल्याची धक्कादायक घटना समोर आली आहे. महिलेने बलात्काराला विरोध केल्याने आरोपीने तिला धावत्या ट्रेनमधून खाली फेकून दिलं.
सकाळी 10.30 वाजता ही घटना घडली आहे. 36 वर्षीय रेवती नावाची महिला तिरुप्पूर येथून आंध्रप्रदेशच्या चित्तूरला निघाली होती. महिला कोईम्बतूर-तिरुपती इंटरसिटी एक्स्प्रेसने प्रवास करत असताना हा प्रकार घडला.
पीडित महिलेने आरक्षित तिकीट नसतानाही ट्रेनने प्रवास सुरु केला होता. सकाळी 6 वाजून 40 मिनिटांनी तिने ट्रेन पकडली. महिलांच्या डब्यात जाऊन ती बसली होती. यावेळी त्या डब्यात तिच्यासह आणखी सात महिला होत्या असं अधिकाऱ्याने सांगितलं आहे. ट्रेन 10 वाजून 15 मिनिटांनी जोलारपेट्टई स्थानकात दाखल झाली. यावेळी डब्यातील इतर सर्व महिला खाली उतरल्या. यामुळे पीडित महिला डब्यात एकटीच होती.
ट्रेन स्थानकावरुन सुटत असताना 27 वर्षीय आरोपी हेमराज त्या डब्यात चढला. तो थोडा वेळ बसला होता. नंतर महिला एकटीच असल्याचं लक्षात येताच त्याने तिच्यावर बलात्कार करण्याचा प्रयत्न केला. जेव्हा महिलेने त्याला लाथ घालत विरोध करण्याचा प्रयत्न केला, तेव्हा आरोपीने तिला धावत्या ट्रेनमधून खाली ढकललं असं अधिकाऱ्याने सांगितलं आहे.
धावत्या ट्रेनमधून पडल्याने महिला गंभीर जखमी झाली असून हात, पाय आणि डोक्याला इजा झाली आहे. अधिकाऱ्यांनी तिला वेल्लोर सरकारी रुग्णालयात उपचारासाठी दाखल केलं आहे. अधिकाऱ्याने दिलेल्या माहितीनुसार, महिला आपल्या आईच्या घरी चालली असताना हा प्रकार घडला.
महिलेने दिलेल्या जबाबाच्या आधारे पोलिसांनी गुन्हा दाखल केला आहे, तसंच आरोपीला अटक करण्यात आली आहे. अधिकाऱ्यांनी दिलेल्या माहितीनुसार, आरोपी हा नियमित गुन्हेगार आहे. याआधीही तो अशा प्रकरणांमध्ये अडकला आहे. याआधीही तो हत्या आणि चोरीच्या गुन्ह्यात अटक झाला आहे.
