अवैध गॅस साठ्यावर पुरवठा विभागाचा छापा; जारगाव चौफुली येथे 18 सिलिंडर जप्त
पाचोरा : जारगाव चौफुली येथे अवैधरित्या गॅस सिलिंडरचा साठा केल्याचा प्रकार उघडकीस आला असून पुरवठा विभाग आणि पाचोरा पोलिसांच्या संयुक्त कारवाईत तब्बल 18 गॅस सिलिंडर जप्त करण्यात आले. या प्रकरणी अकबर मशिदखान (वय 38, रा. जारगाव चौफुली, ता. पाचोरा) याच्याविरुद्ध गुन्हा दाखल करून त्याला ताब्यात घेण्यात आले आहे.
पुरवठा निरीक्षक प्रभारी राहुल गोविंदराव पवार यांनी पाचोरा पोलीस स्टेशन येथे दिलेल्या फिर्यादीनुसार, 2 मे 2026 रोजी तहसील कार्यालयात नियमित कामकाज सुरू असताना जारगाव चौफुली येथे एका गोडाऊनमध्ये अवैध गॅस सिलिंडरचा साठा असल्याची गोपनीय माहिती प्राप्त झाली. या माहितीच्या आधारे तात्काळ पोलिसांशी संपर्क साधण्यात आला.
पोलीस निरीक्षकांच्या सूचनेनुसार पोलीस हेड कॉन्स्टेबल राहुल काशिनाथ शिंपी यांना मदतीसाठी पाठविण्यात आले. त्यानंतर पुरवठा विभाग आणि पोलिसांनी संयुक्तपणे दुपारी सुमारे 1 वाजता छापा टाकला.
या कारवाईत एकूण 18 गॅस सिलिंडर आढळून आले. त्यापैकी 14 व्यवसायिक तर 4 घरगुती सिलिंडर होते. तसेच 9 सिलिंडर भरलेले आणि 9 रिकामे असल्याचे निष्पन्न झाले. जप्त करण्यात आलेल्या सिलिंडरमध्ये विविध कंपन्यांचे सिलिंडर असून एकूण मुद्देमालाची किंमत सुमारे 62 हजार 400 रुपये असल्याचे अधिकाऱ्यांनी सांगितले.
घटनास्थळी उपस्थित असलेल्या अकबर मशिदखान याने सर्व सिलिंडर स्वतःचे असल्याची कबुली दिली. त्याचा जबाब नोंदवून पंचनामा करण्यात आला असून जप्त मुद्देमाल पोलीस स्टेशनमध्ये जमा करण्यात आला आहे.
दरम्यान, ज्वलनशील गॅसचा बेकायदेशीर साठा करून मानवी जीवितास धोका निर्माण केल्याप्रकरणी आरोपीविरुद्ध भारतीय न्याय संहिता 2023 चे कलम 287 तसेच जीवनावश्यक वस्तू कायदा कलम 3 व 7 अंतर्गत गुन्हा दाखल करण्यात आला आहे.
या कारवाईत पुरवठा निरीक्षक राहुल पवार, लिपिक शुभम सपकाळे, सोमनाथ मिस्तरी, भाग्यश्री देवढे तसेच पोलीस हेड कॉन्स्टेबल राहुल शिंपी आणि इतर कर्मचारी सहभागी होते. या धडक कारवाईमुळे परिसरातील अवैध गॅस साठेबाजांमध्ये भीतीचे वातावरण निर्माण झाले आहे.
