पारोळा येथे २ ऑगस्ट रोजी ‘छत्रपती शिवाजी महाराज महाराजस्व समाधान शिबिर’; एकाच ठिकाणी मिळणार विविध शासकीय योजनांचा लाभ.!!!
एरंडोल प्रतिनिधी :-
राज्य शासनाच्या विविध लोककल्याणकारी योजना, सेवा व नागरिकांच्या प्रलंबित समस्यांचे जलद आणि पारदर्शक पद्धतीने निराकरण करण्याच्या उद्देशाने रविवार, दि. २ ऑगस्ट २०२६ रोजी पारोळा येथे ‘छत्रपती शिवाजी महाराज महाराजस्व समाधान शिबिर’ आयोजित करण्यात आले आहे. शासनाच्या विविध विभागांना एकाच व्यासपीठावर आणून नागरिकांना आवश्यक सेवा, दाखले, मार्गदर्शन आणि योजनांचा लाभ देण्याचा या उपक्रमामागील मुख्य उद्देश आहे.
तहसीलदार तथा कार्यकारी दंडाधिकारी, एरंडोल यांच्या कार्यालयाच्या वतीने आयोजित करण्यात आलेले हे शिबिर ओम नमः शिवाय जिनिंग, छत्रपती शिवाजी महाराज प्रवेशद्वाराजवळ, अमळनेर रोड, पारोळा येथे सकाळी १०.०० ते दुपारी ४.०० वाजेपर्यंत होणार आहे. शिबिराचे उद्घाटन आमदार अमोल पाटील यांच्या अध्यक्षतेखाली होणार असून, खासदार स्मिताताई वाघ यांच्या प्रमुख उपस्थितीत कार्यक्रम संपन्न होणार आहे.
शासनाच्या विविध विभागांच्या सेवा नागरिकांपर्यंत सहज, सुलभ आणि पारदर्शक पद्धतीने पोहोचाव्यात, यासाठी या समाधान शिबिराचे आयोजन करण्यात आले आहे. विशेष म्हणजे नागरिकांना विविध कार्यालयांमध्ये वारंवार फेऱ्या माराव्या लागू नयेत, तसेच आवश्यक कागदपत्रे व सेवा एकाच ठिकाणी उपलब्ध व्हाव्यात, यासाठी प्रशासनाने व्यापक नियोजन केले आहे.
या शिबिरामध्ये महसूल, ग्रामविकास, कृषी, महिला व बालविकास, समाजकल्याण, आदिवासी विकास, आरोग्य, शिक्षण, कौशल्य विकास, परिवहन, पोलीस, सहकार, रोजगार, बँकिंग, पशुसंवर्धन, जलसंपदा, महावितरण, नगर परिषद तसेच इतर विविध शासकीय विभागांचे अधिकारी उपस्थित राहणार आहेत. नागरिकांच्या तक्रारी, अडचणी व समस्या ऐकून त्यांचे तातडीने निराकरण करण्यासाठी आवश्यक ती कार्यवाहीही केली जाणार आहे.
शिबिरात उत्पन्न, जात, निवासी, अधिवास यांसारख्या विविध प्रमाणपत्रांसाठी अर्ज स्वीकारणे, सातबारा उतारा, फेरफार, महसूलविषयक मार्गदर्शन, विविध दाखले, प्रधानमंत्री किसान सन्मान निधी, कृषी अनुदान योजना, प्रधानमंत्री आवास योजना, महिला व बालकल्याण योजना, रोजगार व स्वयंरोजगार योजना तसेच इतर अनेक शासकीय योजनांची माहिती व लाभ नागरिकांना उपलब्ध करून दिला जाणार आहे.
याशिवाय शेतकरी, महिला, युवक, ज्येष्ठ नागरिक, दिव्यांग, विद्यार्थी आणि सर्वसामान्य नागरिकांना त्यांच्या शंकांचे निरसन करण्यासाठी संबंधित विभागांचे अधिकारी प्रत्यक्ष मार्गदर्शन करणार आहेत. विविध योजनांसाठी आवश्यक कागदपत्रे, अर्ज प्रक्रिया आणि लाभ मिळविण्याची संपूर्ण माहितीही यावेळी दिली जाणार आहे.
तहसील प्रशासनाने एरंडोल तालुक्यातील सर्व नागरिकांना या शिबिरात मोठ्या संख्येने सहभागी होण्याचे आवाहन केले आहे. शासनाच्या विविध योजनांचा लाभ एकाच ठिकाणी आणि एकाच दिवशी मिळण्याची ही महत्त्वाची संधी असल्याने नागरिकांनी आवश्यक कागदपत्रांसह उपस्थित राहून शिबिराचा लाभ घ्यावा, असे आवाहन तहसीलदार तथा कार्यकारी दंडाधिकारी, एरंडोल यांच्या वतीने करण्यात आले आहे.
