भडगाव तालुक्यात तलाठी व मंडळ अधिकारी बेमुदत संपावर
महसूल कामकाज ठप्प होण्याची चिन्हे
भडगाव प्रतिनिधी :-
राज्यातील विविध प्रलंबित मागण्यांसाठी पुकारण्यात आलेल्या राज्यव्यापी बेमुदत संपात भडगाव तालुक्यातील तलाठी व मंडळ अधिकारी यांनी उत्स्फूर्त सहभाग नोंदविला आहे. महाराष्ट्र राज्य तलाठी संघ च्या निर्णयानुसार दि. २१ एप्रिल २०२६ पासून तालुक्यातील सर्व ग्राम महसूल अधिकारी (तलाठी) व मंडळ अधिकारी बेमुदत संपावर गेले आहेत.
या संपामागे वेतनवाढ, सेवा अटींमध्ये सुधारणा तसेच इतर प्रलंबित प्रशासकीय मागण्यांचा समावेश असल्याची माहिती संघटनेच्या पदाधिकाऱ्यांनी दिली. संपामुळे महसूल विभागातील दैनंदिन कामकाजावर मोठा परिणाम होण्याची शक्यता व्यक्त होत आहे.
विशेषतः सातबारा उतारे, फेरफार नोंदी, उत्पन्न दाखले, जात प्रमाणपत्रे आदी महत्त्वाच्या सेवा ठप्प होण्याची भीती नागरिकांमध्ये व्यक्त केली जात आहे. त्यामुळे नागरिकांना विविध शासकीय कामांसाठी अडचणींचा सामना करावा लागू शकतो.
दरम्यान, प्रशासनाच्या वतीने अद्याप कोणतीही अधिकृत भूमिका जाहीर करण्यात आलेली नसून, परिस्थितीवर बारकाईने लक्ष ठेवण्यात येत असल्याचे समजते. नागरिकांनी अत्यावश्यक कागदपत्रांसाठी पर्यायी व्यवस्था करण्याचे आवाहनही करण्यात येत आहे.
संप किती काळ चालणार याबाबत अनिश्चितता असून, शासन व कर्मचारी संघटनांमध्ये लवकरात लवकर तोडगा निघावा, अशी अपेक्षा नागरिकांकडून व्यक्त होत आहे.
या संपात भडगाव तालुका ग्राम महसूल अधिकारी व मंडळ अधिकारी संघाचे अध्यक्ष अविनाश जंजाळे, सचिव संजय सोनवणे तसेच प्रशांत कुंभारे, योगेश पाटील, एम. जे. खाटीक, विवेक महाजन, दिपक पाटील, शीतल राजपूत, नीता अकोटकर, वैशाली वाघ, प्रियांका शिंदे, गायत्री पाटील, अनिता सुतार, महसूल सेवक किरण मोरे व कविता सोनवणे आदी सहभागी झाले आहेत.
