वृद्ध महिलेचे चोरीला गेलेले ४७,६३० रुपये मध्य प्रदेशातून हस्तगत,कासोदा पोलिसांच्या ‘मिशन स्पेशल-५’ पथकाचा पत्रकारांच्या वतीने सत्कार
एरंडोल ता.प्रतिनिधी (शैलेश पांडे) :
खाकी वर्दीमागील कर्तव्यनिष्ठा, तत्परता आणि जिद्दीचा प्रत्यय कासोदा पोलिसांनी पुन्हा एकदा दिला आहे. वृद्ध महिलेचे चोरीला गेलेले तब्बल ४७ हजार ६३० रुपये चोरांचा माग काढत थेट मध्य प्रदेशातून हस्तगत करण्यात कासोदा पोलिसांना यश आले. या उल्लेखनीय कामगिरीबद्दल कासोदा पोलीस ठाण्याचे स.पो.नि. श्रीकांत पाटील तसेच त्यांच्या ‘मिशन स्पेशल-५’ पथकाचा कासोदा येथील पत्रकारांच्या वतीने शाल, श्रीफळ व पुष्पगुच्छ देऊन सत्कार करण्यात आला.
मध्य प्रदेशापर्यंत पोहोचला तपास
वृद्ध महिलेचे कष्टाचे पैसे चोरीला गेल्यानंतर कासोदा पोलिसांनी तपासाची चक्रे वेगाने फिरवली. चोरांचा माग काढत तपास थेट शेजारील मध्य प्रदेश राज्यापर्यंत पोहोचला. अनोळखी परिसर, भाषेची अडचण आणि चोरांचे स्थानिक संपर्कजाळे अशा विविध आव्हानांचा सामना करत पोलिसांनी अत्यंत गोपनीय पद्धतीने तपास सुरू ठेवला.
चोरांकडून पोलिसांना हुलकावणी देण्याचे प्रयत्न झाले; मात्र पोलिस पथकाने संयम, नियोजन आणि कौशल्याच्या जोरावर चोरांचा माग काढत अखेर चोरीची रक्कम हस्तगत केली.
या कारवाईचा अनुभव सांगताना पोलीस कर्मचारी नंदलाल परदेशी यांनी सांगितले की, “वृद्ध मातेचे कष्टाचे पैसे तिला परत मिळवून देण्याचा ध्यास होता. त्यामुळे तपासादरम्यान आलेल्या अडचणींची पर्वा केली नाही.”
पोलिसांच्या कामगिरीचे कौतुक
वृद्ध महिलेला तिचे हक्काचे पैसे परत मिळवून देत कासोदा पोलिसांनी कर्तव्य तत्परतेचे उदाहरण निर्माण केले आहे. या कामगिरीमुळे नागरिकांचा पोलिसांवरील विश्वास अधिक दृढ झाला असून पोलिस पथकाचे सर्व स्तरातून कौतुक होत आहे.
सत्कार सोहळ्यात स.पो.नि. श्रीकांत पाटील यांच्यासह नंदलाल परदेशी, स्वप्नील परदेशी, दीपक देसले, राकेश खोंडे आणि हरीश परदेशी या पोलीस कर्मचाऱ्यांचा गौरव करण्यात आला.
यावेळी शैलेश पांडे, ॲड. वासुदेव वारे, पत्रकार सागर शेलार आणि प्रशांत सोनार उपस्थित होते. कासोदा पोलीस पथकाच्या या उल्लेखनीय कामगिरीबद्दल त्यांचे सर्वत्र अभिनंदन होत आहे.
