श्रीमती मणिबेन एम. पी. शाह महिला महाविद्यालयात सांस्कृतिक सादरीकरणांतून महाराष्ट्राचा गौरवशाली वारसा उजळला
मुंबई (गुरुदत्त वाकदेकर): सेवा मंडळ एज्युकेशन सोसायटी संचालित श्रीमती मणिबेन एम. पी. शाह कला आणि वाणिज्य स्वायत्त महिला महाविद्यालय, कनिष्ठ महाविद्यालय, मराठी विभाग, राष्ट्रीय सेवा योजना आणि विश्वभान प्रतिष्ठान, मुंबई यांच्या संयुक्त विद्यमाने दि. १ मे २०२६ रोजी महाराष्ट्र दिन व आंतरराष्ट्रीय कामगार दिनानिमित्त “महाराष्ट्राची संस्कृती” या विषयावर सांस्कृतिक उपक्रम उत्साहात पार पडला.
सकाळी महाविद्यालयाच्या प्रांगणात ध्वजारोहणाने उपक्रमाची सुरुवात झाली. ध्वजारोहणानंतर राष्ट्रगीत आणि राज्यगीत सादर करण्यात आले. उपस्थित प्राचार्य, प्राध्यापक, विद्यार्थीनी आणि शिक्षकेत्तर कर्मचारी यांनी राष्ट्रध्वजाला सलामी देत महाराष्ट्र दिन व कामगार दिनाचे महत्त्व अधोरेखित केले.
सांस्कृतिक सादरीकरणांची सुरुवात प्रा. माधवी पवार यांच्या गणेश वंदनेने झाली. त्यानंतर महाराष्ट्राच्या परंपरा, शौर्य आणि सांस्कृतिक वैभव यांचे प्रभावी दर्शन घडले. मायभूमी गीत, ‘वेडात मराठे वीर दौडले सात’ तसेच ‘जयोस्तुते जयोस्तुते’ ही गीते स्वर संस्कार संगीत विद्यालयाच्या संचालिका सुरेखा भुजबळ यांनी सादर केली. ‘धरीला पंढरीचा चोर’ हे सादरीकरण माधवी पवार यांनी प्रभावीपणे सादर केले.
वर्षा घोलप आणि सर्वज्ञ घोलप यांनी सादर केलेल्या नाटुकलीने उपक्रमात रंगत आणली. समृद्धी सोळंके हिच्या वासुदेव वेशभूषेतील अभिनयाने प्रेक्षकांची दाद मिळवली. कोळी नृत्य, शेतकरी नृत्य आणि लेझीम या लोककलांनी वातावरण भारावून टाकले. दिक्षा घनावटे हिने सादर केलेल्या ‘गौरव महाराष्ट्राचा’ या सादरीकरणाने उपक्रमाला विशेष उंची प्राप्त झाली.
उपक्रमाच्या उत्तरार्धात ‘विचार-विस्तार २०२६’ या नावाने विद्यार्थ्यांचे संशोधनपर लेख ‘इन्क्वेस्ट’ या ई-नियतकालिकात प्रकाशित करण्यात आले. मानसशास्त्र विभागाचे ‘बीकन’, मराठी विभागाचे ‘पालवी’, हिंदी विभागाचे ‘सुरभी’ तसेच कनिष्ठ महाविद्यालयातील ‘कॅम्पस कॅनव्हास’ या ई-नियतकालिकांचे प्रकाशन अर्चना पत्की, जगदीश संसारे, सुरेखा भुजबळ आणि वर्षा पालकर यांच्या हस्ते करण्यात आले. त्यानंतर सहभागी सर्व विद्यार्थ्यांचा सन्मान करण्यात आला.
सूत्रसंचालन मनाली मणचेकर हिने प्रभावीपणे केले. शेवटी प्रा. शिल्पा पवार यांनी आभार प्रदर्शन केले. उपक्रम यशस्वी करण्यासाठी नेहा भोसले, प्रदीप पाटील आणि माधवी पवार यांनी अथक परिश्रम घेतले. संपूर्ण उपक्रमाने महाराष्ट्राच्या समृद्ध संस्कृतीचे जिवंत आणि प्रभावी चित्र उभे केले. विद्यार्थीनींच्या उत्स्फूर्त सहभागामुळे हा उपक्रम यशस्वीपणे पार पडला.
