जळगाव जिल्हाध्यक्षपदी हेमकांत गायकवाड यांची निवड; अन्याय, अत्याचार व भ्रष्टाचाराविरोधात संघटित लढ्याचा निर्धार
जळगाव : अन्याय अत्याचार भ्रष्टाचार विरोधी समिती महाराष्ट्र राज्य या संघटनेच्या जळगाव जिल्हाध्यक्षपदी हेमकांत गायकवाड यांची निवड करण्यात आली आहे. संघटनेची बैठक दिनांक १९ एप्रिल २०२६ रोजी पार पडली. यावेळी संस्थापक अध्यक्ष सौदागर महमदरफी यांनी गायकवाड यांची निवड जाहीर करून त्यांना अधिकृत नियुक्तीपत्र प्रदान केले.
या बैठकीत संघटनेच्या आगामी कार्याचा आराखडा स्पष्ट करण्यात आला. महाराष्ट्रभर माहिती अधिकार, मानवी हक्क, पत्रकार संरक्षण, भ्रष्टाचार निर्मूलन, ग्राहक संरक्षण तसेच कायद्याचा प्रचार आणि प्रसार करण्यावर विशेष भर देण्यात येणार आहे. त्याचप्रमाणे नागरिक व शासकीय घटकांना माहिती अधिकाराचे प्रशिक्षण देण्याची महत्त्वपूर्ण योजना राबविण्यात येणार असल्याचे सांगण्यात आले.
पत्रकार आणि माहिती अधिकार कार्यकर्त्यांवर होणारे खोटे गुन्हे व हल्ले याविरोधात संघटितपणे, लोकशाही मार्गाने लढा उभारण्यात येणार असून कार्यकर्त्यांचे सक्षम जाळे निर्माण केले जाणार आहे. तसेच माहिती अधिकार कायद्याचा प्रभावी वापर करून भ्रष्ट नोकरशाहीचा पर्दाफाश करण्याचा निर्धार व्यक्त करण्यात आला.
सामाजिक, शैक्षणिक, सांस्कृतिक, वैद्यकीय क्षेत्र तसेच सरकारी कामकाजामध्ये कुठेही भ्रष्टाचार आढळल्यास त्याविरोधात तक्रारी नोंदवून उपोषण व आंदोलनाच्या माध्यमातून संघर्ष केला जाईल, अशी माहिती संस्थापक अध्यक्ष सौदागर महमदरफी यांनी दिली.
दरम्यान, हेमकांत गायकवाड यांच्या या निवडीबद्दल सर्व स्तरांतून त्यांचे अभिनंदन करण्यात येत आहे.
