एरंडोल पोलीस ठाण्यात आमदार अमोल पाटील यांचा ४ तास ठिय्या; खंडणीखोर अधिकाऱ्याविरुद्ध अखेर गुन्हा दाखल
एरंडोल प्रतिनिधी :-
सामान्य नागरिकांना धमकावून खंडणी उकळणाऱ्या अधिकाऱ्यांविरोधात आता कठोर कारवाई केली जाईल, असा इशारा पारोळा मतदारसंघाचे शिवसेना आमदार अमोल पाटील यांनी दिला. एरंडोल येथील चहा विक्रेत्याकडून १० हजार रुपयांची खंडणी उकळल्याच्या प्रकरणात अन्न व औषध प्रशासन विभागाच्या अधिकाऱ्याविरुद्ध अखेर एरंडोल पोलीस ठाणे येथे गुन्हा दाखल करण्यात आला.
मिळालेल्या माहितीनुसार, एरंडोल शहरातील मढी परिसरात चहा विक्री करणारे गजानन माधवराव महाजन यांच्या दुकानावर दोन दिवसांपूर्वी अन्न व औषध प्रशासन विभागाचे अधिकारी किशोर हिम्मतराव बाविस्कर हे चार साथीदारांसह आले होते. दुकानात कोणतेही प्रतिबंधित तंबाखूजन्य पदार्थ आढळले नसतानाही “तुझ्यावर गुटख्याचा गुन्हा दाखल करतो” अशी धमकी देत त्यांनी १० हजार रुपयांची मागणी केली. भीतीपोटी महाजन यांनी संबंधित रक्कम दिल्याचे समोर आले आहे.
याच अधिकाऱ्याने एरंडोल परिसरातील इतर लहान व्यावसायिकांवरही धाडीच्या नावाखाली दबाव टाकत सुमारे २० हजार रुपयांची खंडणी उकळल्याची माहिती पुढे आली आहे. ही बाब आमदार अमोल पाटील यांच्या निदर्शनास येताच त्यांनी तातडीने कारवाईचा पवित्रा घेतला.
मंगळवारी सायंकाळी सुमारे ५ वाजता आमदार पाटील कार्यकर्त्यांसह एरंडोल पोलीस ठाण्यात दाखल झाले. त्यांनी संबंधित अधिकाऱ्याविरुद्ध तत्काळ गुन्हा नोंदवण्याची मागणी केली. मात्र, पोलिसांकडून सुरुवातीला टाळाटाळ होत असल्याचा आरोप करत आमदारांनी पोलीस ठाण्याच्या पायऱ्यांवरच ठिय्या आंदोलन सुरू केले. “जोपर्यंत गुन्हा दाखल होत नाही, तोपर्यंत हलणार नाही,” अशी ठाम भूमिका त्यांनी घेतली.
या दरम्यान मोठ्या संख्येने शिवसैनिक पोलीस ठाण्यात जमा झाल्याने परिसरात तणावाचे वातावरण निर्माण झाले. अखेर वाढत्या दबावामुळे पोलिसांनी नमते घेत रात्री उशिरा किशोर बाविस्कर व त्यांच्या चार साथीदारांविरुद्ध खंडणी उकळल्याचा गुन्हा दाखल केला.
या प्रकरणी गजानन महाजन यांनी अधिकृत फिर्याद दिली असून, पुढील तपास सहाय्यक पोलीस निरीक्षक शंकर पवार करत आहेत. या कारवाईमुळे परिसरातील भ्रष्ट अधिकाऱ्यांमध्ये खळबळ उडाली असून, आमदार पाटील यांच्या आक्रमक भूमिकेचे नागरिकांकडून स्वागत होत आहे.
